2016 шинал Рио-де-Жанейролий хьусса Олимпиадалул тIуркIурду къуртал хьунни августрал 21-нний. Олимпиадалул хIасиллу укунсса дур: США-нал ларсун дур 46 мусил медаль, 37 арцулсса ва 38 чарвитулсса, цинярдагу – 121 медаль.
Великобританиянал ларсун дур 27 мусил медаль, 23 арцулсса ва 17 чарвитулсса, цинярдагу – 67 медаль.
Китайнал ларсун дур 26 мусил медаль, 18 арцулсса, 26 чарвитулсса, цинярдагу – 70 медаль.
Аьрасатнал ларсун дур 19 мусил медаль, 18 арцулсса, 19 чарвитулсса, цинярдагу – 56 медаль.
Германиянал ларсун дур 17 мусил медаль, 10 арцулсса, 15 чарвитулсса, цинярдагу – 42 медаль.
Япониянал ларсун дур 12 мусил медаль, 8 арцулсса, 21 чарвитулсса, цинярдагу – 41 медаль.
Франциянал ларсун дур 10 мусил медаль, 18 арцулсса, 14 чарвитулсса, цинярдагу – 42 медаль.
ЛивчIми билаятирттал чансса медаллу ларсун дур, мунияту шикку миннал ларсми кIицI даврил мяъна дакъар.
Аьбдурашид Сяъдуллаевлул дурххунни Олимпий тIуркIурдал
мусил медаль
Дагъусттаннал лачIунукку Аьбдурашид Сяъдуллаевлул дурххунни Олимпий тIуркIурдал мусил медаль, 86 килорал кIушиврий лачIун увккун. ХIамид ХIамидовлул цIанийсса МахIачкъалаллал спортшколалул лачIунукку махъсса кIира шинал мутталий щиярчIав ух хьуну акъар. Олимпиадалий га лачIун увккун ивкIссар Венгриянавасса Иштан Верблущал ва 10:0 счетрайну жуласса ххув хьуссар. Яла Венесуэллал Петро Себальслуяр ххув хьуссар 0:5 счетрайну. Полуфиналданий Аьбдурашид ххув хьуссар Азирбижаннахлу уклай ивкIсса дагъусттанлув Шарип Шариповлуяр 8:1 счетрайну (ва хъанахъиссар Олимпий тIуркIурдал чемпионгу). Ахирданийгу, Дагъусттаннал лачIунукку ххув хьуссар Турциянал лачIунукку Селим Яшардуяр 5:0 счетрайну.
Кьиблалул Аьрасатнал спортсментуравату цалчинмур мусил медаль ларсъссар Беслан Мудрановлул дзюдолий ччалли увккун. Хъиривмур кьини мусил медаль ларсъссар Ингушетиянал дзюдочи Хасан Халмурзаевлул.
Мусил медаль ларсъссар Аьрасатнал цалчинмур командалувун греко-румуллал зумунусса лачIунбуккавриву ххув хьуну Давит Чакветадзел.
ЛачIунбуккавриву арцул медаль ларсунни Къабардин-Балкьарнавасса лачIунукку Аниуар Гедуевлул.
Цайми билаятирттахлу буклай
Цайми билаятирттахлу буклай, Дагъусттаннал лачIунбуккулт Шарип Шариповлул ва Ибрагьим Сяидовлул бувгьунни шамилчинми кIанттурду.
ЧIарадиял райондалиясса Шарип Шариповлул чарвитул медаль ларсунни 86 килорай лачIун увккун. Финалданийн уккаврил цIанийсса бяст-ччалливу Шарип Шарипов ух хьуссар жула Аьбдурашид Сяъдуллаевлуяр. Яла, чарвитул медальданул цIанийсса бяст-ччалливу Шарип ххув хьуссар Венесуэллал лачIунукку Педро Фрасиско Себальослуяр 97 килорал кIулшиврий. Шарипов лачIун уклай ивкIссар Азирбижаннал цачIундур командалухлу.
Ибрагьим Сяидовлул Белоруссиянал цачIундур командалувун ларсъссар чарвитул медаль, 125 килорал кIушиврий ччалли увккун. Хасавюртуллал райондалиясса И. Сяидов ххув хьуссар арманичу Леван Берианидзеяр. Сяидов увагу цал ух хьуссар Таха Акгюль тIисса туркнаяр.
Тхеквандочи Радик Исяевлул Азирбижаннал цачIундур командалувун ларсунни цалчинмур мусил медаль Олимпиадалул тIуркIурдай.
Финалданий 80 килорал кIушиврий Исяев ххув хьуссар Нигериянал вакил Аьбдулразакь Иуссуфлуяр 6:2 счетрайну. Чарвитул медаллан лайкь хьуссар Бразилиянал спортсмен Майкон Сикейре ва Кьиблалул Кореянал вакил Чха Дон Мину.
Шиккува бусан, Азирбижаннахлу уклай, Радик Исяев ххув хьуссар цалчинми Европанал тIуркIурдай ва дунияллул чемпионатрай.
ХIадур бувссар ХI. Аьдиловлул
