Микку ттун цIунилгу бувчIай,
Лакрал рухI гъагъан дувансса
Я дяъвирду, я тIюпанну
Дунияллий бакъашиву.
М.-З. Аминов

Халкьуннал дард-диван­ну… Миннул ялув къюкI чIукъалла­лиссагу уххурав дакI чантI кусса инсан? Буниялттунгу, цIанакул лакрал миллатрал хъунмур масъалалух – ЦIуссалак Новостройрайн бизан баврих ургъил бакъасса инсан акъар. Ва масъала дузал бавугу федерациялул даражалийсса бикIан аьркинссар тIий бур депутатъталгу. Масъала чялишну щил щаллу булларчагу, халкьуннал бияла хIисавравун ласлан, балжисса предложенияртту ххал дигьлан аьркинни.
Кьини лахъан багьлагьисса ЦIуссалакрал агьалинанни. Цивппа цамур миналийн бизан байни, цуми-дунугу арши бакъашивурттая цивппа буруччинссару тIий, райондалул агьалири умудрай ва вихшалдарай ялугьлай бусса Аьра­сатнал Федерациялухгу, Дагъусттаннал ва райадминистрациялул хъуниминнахгу. Журив, жущава шаймур бан, личIлулну вичIи дишарду ЦIуссалакрал райондалий ялапар хъанахъиминнал пикри-зикрирдах.

Мариян ЯхIияева, коммерческий банкрал хъунмур бухгалтер:
— Щин ччанссар мина даххана дуллан? Амма райондалий вас-ццахлийсса тагьар дунавхьур, ца къахьунмур хьуннин бизавияв. Ттун ттула оьрчIал, оьрчIал оьрчIал кьадардануйвагу дакI дарцIуну бикIан ччай бур. ЦIанакул жул аьрщарай шартIру къулайсса дур (вагу жу бувсса хъунмасса захIматрал барашиннар), цIусса миналий газ бакъа, щин дакъа цуксса хIаллай ялугьлан багьавив къакIулли. ЦIуницIа цIусса оьрму байбихьлан къабигьари, так хьун бюхъайсса бала-мусиватран нигьачIаву дайщун дан ччимур захIмат кьамул бан хIадурну бура. Жулми оьрчIахьгурхха дусса ихтияр талихIрай, ххарину оьрму бутлан. Жуннив гайннахлу вас-ццах бур.
ПатIимат Шагьмарданова, педагог ва шаэр:
— Ва кIаная жулва кIану хьугу-къавхьуссар, хьугу-къахьунссар. На нава хасну буттал шяравун – ТтурчIив бизавияв, кIий магъив дакьин дарча, яхьунсса къатригума бур. Ттун Новостройрай буккан байсса харж Лаккуйн бурган бувара куну ччай бия жула ТтурчIиял. ЦIанакул жу шикку дуржагьрал ратIнил зуманив кунма буру. Цукун бувчIин бави? КъадакIнил ларсунни ва аьрщи ттун: жу шилун бизан бувсса ппурттуву нину, уссу, гъан-маччами ливтIунни. КIа зунттал ТтурчIиял шяравусса муруллаву ххявхсса къягъул гьивчул ца ччанналух шиккусса неъматру, ттухьва цIувххуссания, баххана къабавияв.
А.И.:
— Ттупанграл къуннагърах хьхьичI авкьунувагу ца чунчIав къаизанна. На шикку хъунмасса захIмат бивхьуссар, ччаву дурссар, арс-душ карав бувцуссар, хъуни бувссар. Танийва хъуни политиктурал итабавкьусса гьалатIрахлу на циванни жаваб дулун аьркинсса ттулагу, ттула гъан-маччанал оьрмурдугу гьалакIу баврийну? Тарив чачаннал миллат цивппагу бизан бувссия. Му къюву вайннан гьаксса хъинну кIулссар. Циванни жуйн кIийла-кIийла кьини дуккан багьайсса? Чачаннал агьалинан яхьунсса къатри дакъа, ялув магъи дакъа ливчIун бунурив? Миннан дагьайссаксса аьрщив цила чIумал дуллуссар.
Минажат Шахмилова, акушерка (балайчи):
— Бизан багьарча личIи, туну, къабивзун чара къахьунссар. Так циняв бивзун махъ, махъва-махъ бизанна. ЦIусса миналийрив мурхьругу бугьанссар, ахъулссагу ххя­ххаванссар, ххуйсса оьрмугу байбишинссар тIисса умуд бур.
Аьйша (70 шин):
— Муруллул зуманив авцIусса инсаннаща ца ша ласун бюхъай­ссарив? Ласука бувхIун лирчIунна дусса нарагу. Хъуннар хьуну дура, дунугу зун ччай дура. Заннал ттунма буллусса шанма гьантта зий, захIмат буллай гьан бан ччай дура. ДакI дакъахьувкун, ттунна ччикун даву дан хъанай дакъара. ЧIявуну дакI къума ларгун, аьтIий лякъара.
Сулайман Чугуев, чичу:
— Бизаннияча чара бакъа бизан багьлай бур. Му проблема щаллу дан ччай бивкIссания, республикалул хъуниминнал ца шинал дянив бизан бантIиссия. Арцу дакъар тIутIавугу багьанар, хъинну ччан бикIарча, махъми иширттан лякъайсса кунна, лякъинтIиссия. ХIукуматрал хъуними ца хIисав дуну бизаврил процесс лапва лахъи буккан буллай чIалай бур. Лахъи лаглагисса мутта тIурча жул чулуха личин тIий бур: цIуну хьусса кулпатирттан аьрщив дуллай дакъар, ца къушлий, къатрал къуманува, кIива-шанма кулпат яхъанахъисса кIантту бур. Бизан шаврил чIявуми жагьилсса кулпатругу яла миккун-тиккун бизлай бур.
Аьрщивгу ккаккан дурну, арцу канихьхьун дириявривухва дуллай айишивияв нава цIусса миналий къатри. Балжину ва масъалалул хIакъираву учин ччимур на учав «Бяйкьусса алши» тIисса пьесалуву.
ХIасан Камалов, школа-гим­назиялул муаьллим:
— Хъинну буруккинттаравун утлай ура бучIантIимунил. Нава тарбия бувсса ва буллалисса оьрчIал бакIурдичIан ци бучIайвав тIий ура. Шиккува оьрмулул перспектива чIалай акъара, гихаллилгу ххари уллай акъара.
Вана арснал кулпатгу ттучIава буссар, вай бакI битан къахъанай ура, къатрал ремонт дан хъанай акъара. Вара бущилий дачирча даву, лахъи лаганссар. Лахъи лавгуннив гьаксса къаччива. Юх­сса хIукуматрал хъуними иш оьчу­лий багьанниннив ялугьлагьи­сса? КIичIирттаву лакрайн «динда­къулт» тIисса чагъарду ляхълай бур, тIааьн бакъасса ишру ццахханну рутлатисса бур. Ххуллу ца бур – бизан! Вай жу кьаритлатимургу хьул бунан хIалал хьуннав, инсантал бакъарив шиккунгу бучIантIисса?
Фируза Рамазанова, халкьуннал театрданул режиссер:
— Чачаннал гъурбатрая зана бикIлакIийни аьркинссаксса компенсациярдугу, Хасавюртуллал зума-къирагърайсса аьрщивгу ларсъссар. Утти ЦIуссалаккуйнгу бизлай бур. Перекрестокрая байбивхьуну, хIукуматрая рухсат ба­къанма къатри дуллай булувкьуну бур. Лакрив мудангу бухнува личIлай бур. ХIакьинусса кьинигу пIякь-шавкьлил зараллу биян бувсса къатри дакьин дансса компенсацияртту буллай бур жучIа. Вай арцу Новостройрайн дурган дурну, цахъи даву анавар дан къабучIиссарив?
Ярагъи Аьлиев, культуралул къатлул директор:
— Шикку мина къахьуншиву мяълумну чIалай бур. Чансса хIаллайвагу инсантал давурттая мурахас бувну, цала хьунтIими минардаха зузи барча хъина. Бигьалагай кьинирдайвагу автобусирттай занай, зун бучIир къатраха, жунна-жунна аьрщив ккаккан дарча. Укун буварчари даврил лябукку бикIан.
Ва къювусса масъалалул хIакъи­раву жулва миллатрал хъунисриннал, махъ нанисса маллатурал цалвами маслихIатру буслай бакъар.
Гьарца кьини вас-ццахлийнма буру. Ккулла-за щуну инсан больницалийн агьну ур тIий баярча, кIирагу щар – Чапаевка ва ЦIуссалак, больницалучIан дуккай щил цу урив ккаккан.
Газру бихьлай бур райондалий­сса щархъавун, идарарттал къатраву ремонтру дуллай бур. БизантIийгу бунува шиккун харж дуллалими арцугу Новостройрайн циванни дурган къадайсса?
СахIив МахIаммадова, педагог, ш. Чапаевка:
— ОьрчIру бизарчагу, ттун ши­ккува бацIан ччива. ЦIусса миналий­сса оьрмугу цукунсса бикIанссарив къакIулли. Ттун бикIай ца авлахърал кIану бусса кунма. Цуппагу даим мурчал гьалак буллайнмасса.
Шамил (дуклаки оьрчI):
— Бавал учай, цаппара шиннардива цамур кIанайн бизантIиссару, куну. Циванни куну цIувххукун, ганища ттухьхьун рахIатну жаваб дулун къашай. Нагу учара: тикку оьккину бикIантIиссарив. КъабикIантIиссар, учай. Оьккину къабикIан тIий бухьурча, туну зат бакъар, учара.
М.К.:
— Ци биза-къабизаврил хаварди? Миха-тиха увкIмари мукун цIухлантIисса. Шиккуваминнан кIулссар бикъавзун пайда бакъашиву. Ци чиви? Укунссар кьисмат бивкIсса. РартIун кахригу, зунтIиссару аьрщараха. Ва ххуллух мяйжаннугу жулламур аьрщараха.