ЦIуссалакрал райадминистрациялул хъунаманал заместительну зий ур чачаннал миллатрал инсан Жамалдинов Умар. Ва райондалий ялапар хъанахъисса кIивагу миллатрал масъалартту цавайннайнмагу щавщи къабиянну, дипломатиялул зумувну щаллу байсса шартIру дикIан аьркинни. Мукун байминнавасса ца хъанай ур Умаргу. Ванахьхьунгу буларду ца-кIива суал.

— Умар, ина ЦIуссалаккуйва увсса, хъуна хьусса урав?
— На увну ура Къиргъизнаву. Ттун 4-5 барз хьусса чIумал, ттул нину-ппу бивзун бур ЧIурттахьхьун. Гикку бувну къатригу, ялапар хъанай бивкIун бур. Нагу гиккува хъуна хьуссара.
— Гичча бизлазийни вил нитти-буттал кьабивтсса къатрал бакIра­чIан ци бувкIун бия?
— Гайннуву лакрал кулпат ялапар хъанай бия.
— Бавссарив вила нитти-буттал зумату зула къатрал заллухъру хьусса лакрал чулухунмайсса сситтуйсса махъ?
— Цуксса жунма кьутIлай бивкI­хьурчагу, кьурчIину бивкI­нугу, лакрайн лахъунтту баву къархьу­ссар.
— Лак бизан баврилмур масъа­ла сукку байхту, хьунав лакращал къатрайн тамахIрайсса ихтилатру?
— ТIайлассар, лак Новостройрайн бизлазисса ихтилатру сукку хьувкун, байбивхьунни заллухъру цамур кIанттаву ялапар хъанай, кьункьулливгу дирхьуну кьабивтсса, бачIвасса къатри тIалав буллалисса кIанттурду хъанай. Мукун барча цивппа компенсациялуцIа хьунссару тIий, лак рязи къавхьунни. Укунсса иширттаву маслихIат ккаклан багьай. Райондалул администрациялий зий ттул 10 шинни, райондалул администрациялул нукIувама хъунама Нахаев АхIмад ттул шяравучури, мунал уссу ттущал ца классраву дуклай уссия. ЧIивинияцIагу лакращал щяикIлай – излай вардиш хьуссара.
— Туну ци учин бюхъанссар вища лакрая?
— Ттул мудангу лакращал ххуй­сса ала-ссалам, бухху-букку бу­ссар, бугу-бикIантIиссар. Буссар ххуйсса гьалмахтал, мачча хьусса кIанттурдугума.
— Лак бизлазийни ххуй-ххуйми къатрал цIаний бяст-ччал багьну, зула миллатрал вив питна шайхха тIисса нигь дакъарив?
— Къатри бачIаврил кьянкьасса низам дикIантIиссар: нукIувасса заллухъруннахьхьунни къатри зана ритлатисса, му акъахьурча, гъан-маччанахьхьун, мигу бакъания махъ, шяравучунахьхьун буллалиссар.
— Ина лакращал нахIу-хIаласса инсанна тIий ура. Райондалул администрациялул даврий зий 10 шин дурну, халкьуннал дард-хажалат кIулсса инсан ура. Лакран ттигу бизан багьлагьисса трагедиялул вийн цукунсса асар биян бай?
— Цуксса кьурчIисса асар биян булларчагу, му ххуллу лакрал миллатрал цала язи бувгьуссар, му чачаннал миллатралгу мурадри. Изан къаччиманахь гуж буллали­сса кIанугу бакъассар.