Жу ЦIуссалаккуй Новостройрай дацIантIи кьинилия ихтилат сукку байхту, райадминистрациялул хъунама Арсен Каммаевлул жухь увкуна:
«ВичIан бавнунияр, яруннин ккавккун хъинссарча, ци иш-тагьар дурив ккаккан, бачияра зувагу Новостройрайн биян», куну.
Икьрал дурсса кьини Арсеннущал жу гихун лагайхту, тIайланма багьунав нюжмардий цал шайсса зузалтрал совещаниелийн. «Новострой» трестрал управляющий МахIаммад Аттаевлул цалва ихтилатраву бувсуна, майрал 10-15-нний Новостройрайн аьлтту буккан республикалул правительствалул хъунама Х. Шихсаидов, Госсоветрал председатель М. МахIаммадов ва м.ц. хъуни къуллугъчитал, министртал бучIан тIий бушиву. 1997 шинал харж буллуну къуртал бувшиву, амма Арсен Каммаевлул ЦIуссалакрал бюджетрава (буржирай), Новостройрал зузалтран гъира бутан, харжи булун буллусса 260 млн. арцул лахъаву дан хъанай бакъашиву. КIицI лавгуна хIакьинусса кьини даву сантирай нани дансса арцу цачIара дакъашиву. Зузалтрал суаллахьхьун жавабругу дуллуну, Аттаевлул, ихтилат къуртал буллай, увкунни: дакъар арцу, арцу дакъаний цукунни зунтIисса?
Арсен Каммаевлул цалвамур ихтилатраву чIурчIав дунни правительствалущалсса хьунабакьаву зузалтрал совещаниялий куннасса дикIан аьркиншиврий, строительтурал булун аьркинсса суаллугу хIадур бувну, цивппа цукун захIматсса шартIирдай зий буссарив бусан аьркиншиврий.
«Арцуйну бакъагу, стройматериаллайну, турбардайнугу бан шайссар правительствалуща кумаг. Му кумаг тIалав буллан, кьянкьасса ихтилат буван нагу хIадурну ура. Республикалул хъуниминнан цанмагу ххал хьунссар захIмат жапасса шартIирдай зий бивкIминнал бучIисса даву дурну душиву», — увкуна ахирданий Арсен Каммаевлул.
