Совещание къуртал хьуну мукьах, Арсен Каммаевлущал, бизан баврилсса буллалисса оргкомитетрал председательнал хъиривма Шамил Акаевлущал ва трестрал хъунама инженер МахIаммад Мусаевлущал, жу бивру лагма-ялтту дуллалисса шяраваллавун, хьунабавкьуру участкарттал хъуниминнащал, строительтуращал, шяраваллаву яхъанахъисса кулпатирттащал.

Новострой… Ххюра-ряхра шинал хьхьичI дакъассия шикку я магъул дурсса мина, я тахта-тIама, кирпич, шифер, цемент. Хьуну дур хъунисса дахханашивуртту. Чан-чанну тIий ххи хъанай дур къатри. Цала кьудратраха лавхьхьуну зий бухьунссар инсантал. Ххари буллай буру жугу дахханашивурттал. Аьхъардал шяраваллин хIадур бувсса школалул сир бувккун хIадур дур­сса полданий ливчIунни жул шаттирдал ххиттул къалипру.
Нузру ва чIавахьулттуми пIяй-пIяй тIий ялугьлай буну­ккар заллухъру бучIаннин. ЧIал къавхьуну га школалул кабинетру буцIинтIиссар оьрчIал гьура-гьайтлил чIурдал, чIун-чIумуй зяр учавантIиссар занглилгу, зяй-зяй тIунтIиссар шадсса кьинирдугу.
ТIюхчардал шяравух нанийкун, жула хъунама «экскурсовод» Мусаев МахIаммадлухь цIуххарду, ахъру бугьлай буссарив куну.
— Гьарца кулпатран дуллалиссар 60 метра лахъишиврий­сса ва 25 метра утташиврийсса лагрулул аьрщи. Къатри дурну лирчIмур кIанай, гьай-гьай, бугьлантIиссар ахъругу. Хъуни­сса ахъруми бугьлан бучIиссар циняв къатри дурну, гьанурду цIакь хьувкун. Дургьумур хьуншиврул рутIлатIисса щинал бюхъайссар чIиртту хъячин бангу.
Вара шяраваллил участокрал хъунама Эфендиев Сайпуллагь буслай ур:
— АцIра участкалун ца автокран буний рухI къадуклан­ссарив? Харжругу къабуллайкун, ливхъун нанисса зузалтрахь арулцIаллий арулва миннат бара, ссавур дара, бацIияра тIий. ХIакьину къулай къахьурча иш, гьунттий хьунтIиссар тIий рахIат буллан икIара.
Кураторну зузисса ХIусманов Нураттиннул тIурча цаламур оьр­мулия укун бувсунни: «Яхъа­най ура шиккува, тIайлассар, цайминнал къатраву яхъанай ура. Залуннал цува изаннин яхъа­нан ихтияр дуллунни. Участкардал начальниктуралвагу бакъа­ссар цалва къатри цалсса. Цала-цаласса буллай бур къаучиншиврул, ттинин ихтияр дакъая цал жулами къатри щаллу буллан. Дукра столовайлуву дукара, пекарналуву ччатI байссар. Цахъи яхI барча, гихунмаймур ишгу бачинссар тIий ура».