ДР-лул Диндалул иширттаха зузисса комитетраву хьунни Комитетралгу, УФСИН-лул зузалтралгу цачIусса совещание. Совещание хьунни Дагъусттаннай терроризмалул идеологиялийн къарши бацIаврил программа щаллу дуллалисса давурттал лагрулий.

Дагъусттаннал Диндалул комитетрал пресс-службалул бусласимунийн бувну, заседаниялий ххал бивгьуну бур дуснакь бувминнан диндалул кIулшивуртту дулаврил, миннахь исламрал дарсру дишаврил масъала.
Комитетрал председательнал хъиривчу Расул ХIамзатовлул кIицI лавгунни ва даву, пенитенциар системалул идарарттай зузисса, дуснакь бувминнал дин-чак баврил хIалкьазия кIулсса имамталгу кIункIу бувну, ДР-лул Муфтиятрал дан аьркиншиву.
— Ва даврия чIалачIисса мюнпат хьунссар дуснакьирттай чак бан, Кьуран буккин лахьхьин буллалисса программарду зузи дарча, — увкунни Диндалул комитетрал вакил Давуд Тумалаевлул.
Дагъусттаннал Диндалул комитетрал ва Муфтиятрал вакилтурал икьрал дунни УФСИН-лул хъуниминнащал, зуруй цал дуснакьирттайн бувкIун, щябивкIминнахь лекциярду буккин ва диндалул, мяърипатрал хIакъиравусса ихтилатру бан.
— Колониярдайн дин лахьхьин дуллалисса программарду дулурча, мудан диндалия бусласисса лекциярду ккаларча, дарсру дихьларча, миннуя кумаг хьунссия дуснакьравуми ххуй чулинмай баххана бан, тIайла бацIан бан, — увкунни тарбиялул масъаларттаха зузисса Дагъусттаннал УФСИН-лул хъунаманал хъиривчу Аьликьади МахIаммадовлул ва тарбиялул давриха зузисса отделданул хъунама Мевлан АхIмадовлул.