Пятигорск шагьрулий Ухссавнил Ккавкказуллал федерал округрал регионнал бакIчитуран ккаккан унни ва округрайсса Аьра­сатнал Федерациялул Президентнал цIусса вакил Олег Белавенцев. Мероприятиялий гьуртту хьунни хьхьичIма вакил,
цIана – Аьрасатнал Федерациялул национал гвардиялул аьралуннал Федерал къуллугърал директорнал хъиривчу, Аьрасатнал национал гвардиялул аьралуннал главнокомандующий Сергей Меликов, Ухссавнил Ккавкказуллал федерал округрал субъектирдал бакIчитал, вакилнал аппаратрал зузалт ва цаймигу.
Сергей Меликовлул бувсунни ттизаманнул Ухссавнил Ккав­кказуллал ляличIишивурттая. Ганал мукъурттийн бувну, махъсса ппурттуву Ккавкказуллал республикарттац ххуйсса шартIру дурну дур туристътуран, лавай хьуну бур округрай мюхчаншиврул даража. Ганал барчаллагь увкунни даврил уртакьтурахь цащалла цачIу дур­сса давурттахлу. Ганал бувсунни цинявннащал тIайласса арарду щаллу дуван бювхъушиву.
АьФ-лул Президентнал СКФО-райсса вакил Олег Белавенцевлул хьхьичIма вакилнахь барчаллагь увкунни дурсса давур­ттахлу. ЦIусса вакилнал бувсъсса куццуй, ваналгу, хьхьичIма вакилналгу Ухссавнил Ккавкказуллал хасъсса паччахIлугърал политика цакуцсса дур.
«На дакI дарцIуну ура цачIусса хIарачатирттайну жува щаллу баншиврий Аьрасатнал Президентнал жулва хьхьичI бивхьусса ма­съалартту. Яла агьаммур – Ух­ссавнил Ккавкказнаву аьмсса Аьра­сатнал паччахIлугъ цIакь давур ва округрал маэшат гьаз бавур», — увкунни Олег Белавенцевлул.
Яла Олег Белавенцевлул жаваб­ру дуллунни журналистътурал суаллахьхьун.