Август зурул 8-нний «Машук-2016» форумрал лагрулий ларай­сса даражалий кIицI ларгунни «Дагъусттаннал кьини».

Форумрай «Дагъусттаннал кьини» кIицI лаглагисса шадлугърай гьуртту хьунни ДР-лул Правительствалул председатель Аьбдуссамад ХIамидов, ДР-лул Жагьилтурал иширттал министр Арсен ХIажиев,Миллатирттал политикалул министр Татьяна Гамалей, Халкьуннал художествалул промыслирдал ва туризмалул министр МахIаммад Исаев, Дарбантуллал шагьрулул мэр Малик Багълиев ва м.ц.
Республикалиясса делегация хьунабавкьунни ва ихтилатру бунни форумрайсса дагъусттаннал жагьилтуращал.
ДР-лул Жагьилтурал иширттал министр Арсен ХIажиевлул бувсунни муниципалитетирттан мюнпат бусса чIярусса проектру сакин дурну душиву республикалул жагьилтурал ва ми проектру цирдагу, цаппарасса багьана-сававрттайн бувну, иширайну дузрайн ду­ккан дан бюхълай бахъашиву. Мунийн бувну министрнал кIицI лавгунни, республикалий чара бакъа сакин дуван багьлай бушиву, жагьилтурал проектру иширайну зузи дуллан­сса ка-кумаг баву, чIарав бацIаву мурадрайсса фонд. Ванал бусаврийн бувну, вай чIяруми проектру иширайну зузи дуван бю­хъарча, респуликалий гьарза бан бюхълай бур жагьилтал зун­сса кIанттурду.
Аьбдуссамад ХIамидовлул ванан маслихIат ккаккунни ва пикрилущал Республикалул Правительствалийн уккаву.
Мукунма форумрал давриву кIицI лавгунни укунсса журалул форумру Дагъусттаннал аьрщарайгу буллансса.
Ихтилатру бувну махъ делегациялул ххал бивгьунни форумрай жагьилтурал майданну хIадур бувсса куц.
ТIивтIуну бия шикку Дагъусттаннал халкьуннал промыслирдал авадансса майданну. Цинявппа хъамаллурал хьхьичI усттарну халичартту щашлай, зий булувкьун бия Табасараннал халичартту щащулт, тIахIунттив дуллай бия дунияллийх цIа ларгсса бархъаллал усттартал.
Му бакъассагу Дагъусттаннал щархъавасса усттартурал лавсун бувкIун бия шиккун хъинну хьхьичIавасса жула культуралул багьу-бизу ккаккан буллалисса кьай-кьуй.
Форумрал гьурттучитуран яла-яла къулай бивзунни Да­гъусттаннал промыслирдал усттартурал ккаккан буллалисса мастер-классру.
Ххунзахъиял райондалул Аьрасатнал халкьуннал аьдатирттал ва культуралул центрданул вакил Хатимат Далгатовал бувсунни форумрайн лавсун бувкIшиву яла хьхьичIунми усттартурал бувсса нажагьсса бакъа къаливчIсса музыкалул инструментру, ГьуцIалтIиял усттартурал дурсса кьай-кьуй.
Халкьунннал художествардал промыслирдал центрданул вакил Магьият Даудовал форумрайн бувкIсса хъамал кIул бунни бархъаллал тIахIунттив даврил кьюлтIшивурттащал. Бувсунни синааьрщарая дур­сса тIахIни-кIичIулул яла ххуймур хасият душиву дуки-хIачIия хъунма­сса хIаллай, дусса куццуй ядуван бюхъайшиву. Майданнай республикалул усттартурал дурсса караматру дакъассагу, хъамаллурал хьхьичI дихьлай бия Да­гъусттаннал миллатирттал дукрарду. Форумрай мяйжаннугу жагьилтураща ккаккан дуван бювхъунни дагъусттаннал халькуннал авадансса культура, аьдат­ру ва багьу-бизу.
Му бакъассагу, форумрал гьурттучитураща бюхълай бия хIала буххан дагъусттан­нал миллатирттал спортрал тIур­кIур­давухгу.
Дагъусттаннал делегациялул лавайсса кьимат бивщунни жагьилтурал форумрай «Дагъусттаннал кьини» ларайсса даражалий тIайла дуккаврихлу.
ДакIнийн бутанну Ухссавнил Ккавккказуллал жагьилтурал форум нанишиву август зурул 5-нния 19-нийн бияннин. Гьашинусса форумрай гьурттушинна дан бюхъайссар проектру да­къаминнащагу. Форумрай­сса жагьилтурал проектирдал конкурсрай ккаккан дурну дур идарарттансса 2,5 млн. арцунсса 20 грант, инсантуран 300 азарда къурушрансса 75 грант, 400 азарда къурушран­сса 20 грант ва 10 грант 500 азарда къурушрансса.
Ухссавнил Ккавкказуллал жагьилтурал «Машук-2016» форум хъанахъиссар жагьилтурал социал иширттал ва кIулшивуртту дулаврил проектну, цурдагу элмулул, экономикалул, политикалул, искусствалул, культуралул, информациялул технологиярттал ва цаймигу арардаву хьхьичIун ливчусса, итххявхсса жагьилтал аьл­тту буллалисса ва миннал чIарав бацIлацIисса. Форумрай гьурттушинна дан бю­хъайссар Ухссавнил Ккавкказуллал Федерал Округрай ялапар хъанахъисса, 18 шиная 30 шинал оьрмулийн бияннинсса инсантураща.