Правительствалул председатель Аьбдуссамад ХIамидовлул гьурттушинна дунни Ухссавнил Ккавкказуллал «Машук-2016» форумрал даву дайдихьлахьисса шадлугърай.

ДакIнин бутанну «Машук» форум хъанахъишиву социал иширттал ва кIулшивуртту дулаврил проектну, цурдагу Ух­ссавнил Ккавкказуллал Федерал округрайсса экономикалуву, политикалуву, журналистикалуву,
искусствалуву, культуралуву, информациялул технологиярттаву ва цаймигу арардаву чялишну гьуртту хъанахъисса жагьилтурал суккушиннардал чIарав бацIан ка-кумаг буллалисса. Форумрал сакиншинначитал хъанай бур СКФО-райсса АьФ-лул Президентнал полпреднал аппарат, Ставраполлал крайрал Правительство, Жагьилтурал иширтталсса буллалисса федерал агентство.
Форумрал даву дайдихьлахьисса шадлугърай, жагьилтуран конкурсирдаву гьурттушинна дурну грантру ласун­сса тIайлабацIуртту чIа тIутIисса ихтилат бувна Аьбдуссамад ХIа­мидовлул.
Премьер министрнал ши­кку ххал диргьуна хьхьичIрами форумирттай хьхьичIунсса кIанттурду бувгьусса ва хIакьину иширайну зузи дурсса жагьилтурал проектру.
— Ва хъуннасса агьамшиву дусса, хъинну аьркинсса форумри. Цинявннаща бюхълай бакъар цайми республикардая­сса цивппа кунмасса жагьилтуращал хьунабакьлай, миннал дуллалимур ххал дуллан. Му чулуха ва форумрал жула жагьилтал кувнначIан кув гъан буллай, цачIун буллай бур. ЧIяву миллатру бусса аьрщарай ялапар хъанахъисса жунма, кувннан кув кIулну бикIаву хъунмасса затри. Вай форумру буллалаврийну ххишала хъанай дур жула оьрчIал цайми регионнай ялапар хъанахъисса оьрчIащал дусшиву дансса ва кIул хьун­сса сант. Дусшиврулли жула ми­ллатирттал дянивсса уссурвалшиврийсса арардугу цIакь дувантIисса, — увкунни Аьбду­ссамад ХIамидовлул.
Ванал мукунма кIицI лавгунни Республикалул ва Ухссавнил Ккавкказуллал жамятий­сса- политикалул иширттаву жагьилтурал дуллалисса гьурттушиннарду.
— Цинявннан чIалай дур хIа­кьину Дагъусттаннал БакIчи Рамазан АьбдуллатIиповлул каялувшиндаралу республикалий дурсса чIалансса ва мюнпатсса тамансса дахханашивуртту хьушиву. Республикалий дуллали­сса давуртту гихуннайгу лажин кIялану дулланшиврул, хъуннасса мюхтажшиву дуссар зун ччисса, гъира-шавкь дусса жагьилтурах. Хъиннува ххари хъанай ура жула регион «Машук» форумрай ласласисса грантирдаву хьхьичIххуттай дуну тIий, — увкунни ХIамидовлул.
Республика хьхьичIуннай даву мурадрайсса приоритет проектирдаягу бувсун, Аьбдуссамад ХIамидовлул ДР-лул Жагьилтурал иширттал министр­найн тапшур бунни гьунар бусса, итххявхсса жагьилтурал дуллалисса давурттал чIарав бацIлацIаву. Ванал мукунма кIицI лавгунни вай шикку дуручлаччисса цинярдагу проектру иширайну зузи дулланшиврул ка-кумаг буллай, чIарав бацIлан аьркиншиву.
Республикалул Правительствалул председательнахь жагьилтурал маслихIат ккавккунни, цинявппа форумрай гьуртту хъанахъисса жагьилтурал проектирдая бусласисса, миннущал кIул буллалисса электронный ресурс сакин дувансса.
Форумрай ЧIухърал шяраваллил жагьилтурал иширттал­сса буллалисса администрациялул хъунамал хъиривчунал су­кку бунни зунттал щархъава жагьилтал бизлазаврил масъала. Аьбдуссамад ХIамидовлул бувсунни ва масъалалул хIакъираву ихтилат хьушиву уттигъанну республикалий хьусса «Зунттал щархъал форумрайгу».
— На навагу хъуна хьуну ура шяраву. Таний цIана кунма халкьру щархъава шагьрурдайн ливхъун къабачайва. Цинявппа кулпатру вардиш хьуну бия хъурунниха, ризкьилуха зий цалва маэшат цивппа буллай. Цуксса хIайпнугу цIана щархъаву зун, захIмат буллан ччай цучIав акъар. Шяраваллаву агьали бацIланшиврул хIукуматрал буллай бур школарду, оьрчIал багъру, буцлай бур щархъавун газ, ток, хIасил цукунсса ци шартIру дузал дулларчагу жагьилтал шяраваллаву бацIан ччай бакъар, — увкунни Аьбду­ссамад ХIамидовлул.
«Сборная Дагестана» КВН-далул командалувасса Арсен ЛухIуевлул гьаз бунни жагьилтал цачIун батIлансса, мероприятиярду дуллансса центр бакъашиврул масъала. Правительствалул председательнал махъ буллунни жагьилтурал центр тIитIин кумаг буван. Гьашину Дагъусттанная «Машук» форумрай гьуртту хъанахъиссар сайки 400-нная ливчусса гьунар бусса, итххявхсса жагьилтал.
Август зурул 8-нний форумрал даврил лагрулуву кIицI ларгунни «Дагъусттаннал кьинилун» хас дурсса личIи-личIисса шадлугъру.