Дуккаврил шингу къуртал хьусса, гъинтнил цалчинсса зурул гьантри бур дуклакиминнан, школалийминнан бикIу, гихуннайсса дуккаврил идарарттавуминнан бикIу, аварасса, кувннал экзаменну дуллай, ца классрава цамунивун нанисса, кув, школа къуртал бувну, ЕГЭ-рду дуллуну, ВУЗзирдавун дуклан бухлахисса,кувгу – ВУЗру къуртал буллай, дипломрал давуртту дуручлачисса. Муна мукунсса, дипломрал давуртту дуручлачисса, авара бия июньдалул 30-нний Дагъусттаннал педагогический университетрал художествалул ва графикалул факультетрай.
Бадрижамал Аьлиева
Ва кьини махъсса шиннардил мутталий цанма лавхьхьумунил хIасиллу дуллай бия «Живопись» ва «Изобразительное искусство и мировая художественная культура» направлениярттай дуклай бивкIми. Цалла живописьрал полотнарду ва графикалул чIапIив ккаккан дунни 8 чIава художникнал. Выпускниктурал цалла дипломрал давуртту щаллу дурну дия РАХ-лул член-корреспондент, Аьрасатнал лайкь хьусса художник, профессор Аьбдулзагьир Мусаевлул, Аьрасатнал лайкь хьусса художник Хайруллагь Кьурбановлул, Дагъусттаннал лайкь хьусса художник Юсуп ХанмахIаммадовлул ва тарихрал элмурдал кандидат Тимур Мусаевлул каялувшиндаралу.
ПаччахIлугърал аттестациялул комиссиялул председательну ия РАХ-лул член-корреспондент, ДР-лул Художниктурал союзрал председатель Кьурбанаьли МахIаммадов.
Комиссиялул члентурал чIава жагьилтурал давурттан лавайсса кьимат бивщунни.
ТIайлабацIу зун гихунмайгу, чIава художниктал!
