Тикку гьурттушинна дунни миллатирттал арардалсса, жямат­рал иширтталсса ва динийсса идарартталсса буллалисса Дагъусттаннал Халкьуннал Мажлисрал Комитетрал председатель, «Справедливая Россия» фракциялул хъунама Камил Давдиевлул, отделениялул члентурал, Халкьуннал Мажлисрал депутатътурал. Камил Давдиевлул цалва ихтилатраву кIицI лавгунни, партиялул гьанумур мурад бушиву тIайлашиву ччисса, аьдил­сса общество хIасул дуваву, хъиривмур созыврал лагрулий му мурад­рай, агьалинан къулайсса 25 закон кьамул дуван багьлай бушиву.
«Дагестан – территория мира и развития» тIисса жул программалуву хъунмур къулагъас дуссар ца­ппара сферардаву агьалиная арцу ласаву дукьан дуваврих, ЖКХ-лул масъалартту бартбигьаврих. ЖучIара республикалий дуссар граждантурал ихтиярду дуруччаврил Центр, миккун ЖКХ-лул секторданувусса диялдакъашивурттая аьрзирдай бучIай агьали сайки гьар кьини. Жул мурад бур капремонт­рахсса взносру дукьан даву, мукунма транспортрахсса ва аьрщарахсса налогру дукьан даву тIалав буван», — тIий ур Камил Давдиев. Мунал балжину бувсунни агьалинал маэшат гьаз баву мурадрай ялагу цуку-цукунсса давурттив дуллан дакIний буссарив, кIицI лавгунни АПК-лул, промышленностьрал, спортрал, туризмалул масъаларттахагу зун дакIний бушиву, республикалия партиялул Халкьуннал Мажлисравунсса бувчIавурттай 180 кандидатнал цIа рищунтIишиву.