МахIаммадлул душ МахIаммадова Роза
Цаппара гьантрал хьхьичI жува жижара бувссия ХIажи ва Роза МахIаммадовхъал арс Арслан ахиратрахьхьун лагаврил. Утти, мунила хъирив, жуятува личIи хьунни Арсланнул нину Розагу. Къархьунни ниттил къюкIлища арс накьлу хьусса дард духIан.
Роза бувну бур 1939-кусса шинал Карашрал шяраву, Буттал КIанттул цIанийсса дяъвилул шиннардий цIа дурккун диркIсса Карашрал колхозрал председатель МахIаммад Абакаровлул ва Сабиратлул къушлий.
Ванил ппу илданий машгьурну ивкIссар «Абакаруп» тIисса цIанилу.
Розал, Карашав арулла шинал школагу къуртал бувну, МахIачкъалалив бувккуну бур 10 класс. 1970-кусса шинал къуртал бувну бур Дагъусттаннал паччахIлугърал университетрал химиялул факультет. Университет бувккуну мукьах Роза бацIан бувну бур тиккувасса элмулул центрданий, чIярусса шиннардий зийгу бивкIссар, бакIрайва лаборантну, яла – элмулул зузалану. Зузиссаксса хIаллай ванил чIалачIи бувссар цуппа бюхъу-хъит буну зун шайсса инсан бушиву ва ректоратрал ванин багьайсса кьимат бивщуссар.
Роза бия ляличIину караматсса, дакI хъиншиврулгу, чумартшиврулгу вибувцIусса, цIу бусса, чIявусса хъами-душваран эбратранну оьрму бутлатисса хъамитайпа. Ва бия жула лакралгу ва цайми миллатирттал халкьунналгу дукрарду даврил усттар-кулинаргу. Хъамал чан къашайсса ХIажиналгу, Розалгу къатлуву чIявуссаннал тIин-тIааьн лавсъссар ванил дурсса караматсса дукрардая.
МахIаммадлул душ Роза жуятува личIи шаврил хъуннасса кьурчIишиву кIидачIлай, дакIнийхтунусса жижара буллай буру ласнахь ХIажинахь, арснахь МахIаммад-ХIажинахь, душнихь Заидатлухь ва махъсса щалагу агьлу-авладрахь.
Розал бунагьирттал аьпа баннав, цил рухI рахIатний дишиннав.
Уручуллал, Карашрал
ва Кьукуннал жяматру
—————————————
Гьаруннул арс Аьвдуссамад
Вай гьантрай, Алжаннул къапурду тIивтIусса Рамазан зурул байбихьулий, аьпалул хьунни ххаллилсса чув-адамина, иман ххисса, хIалимсса хасиятрал заллу, Гьаруннул ва Рукьижатлул арс Аьвдуссамад.
Увну ур Аьвдуссамад 1938 шинал ЧукIнав. Буттал шяраву школа къуртал бувсса чIумалва, ванал учайва: «На ттула шярава чунчIав къагьанна», – куну. 1957-1960 шинал армиягу лавхъун, зун ивкIссар колхозрал яттил хIухчуну. ЗахIмат-жапа къатIий, пенсиялийн укканнин зийгу уссия му цала пишалий. Пенсиялийн увккун махъгу, шава ацIан къахъанай, лагайва къутаннайн, яттилсса бан, кумаг бан.
Аьвдуссамадлул бивкIулул кьурчIишиву дакIнихтуну кIидачIлай, жижара буллай буру ванал кулпат Бахттуннухь, арс МахIаммадлухь, уссихь, ссихь ва циняв гъанчунахь. Ванан къабуллусса оьрму булуннав махъминнан, алжаннул ххари аннав, гьав нурданул дуцIиннав.
ЧукIуннал
ва ЧIяйннал жяматрал чулуха НякIучиев Аьвдулкьадир
Ласнал бивкIулийн
Вин гьантта гъан хьусса
кIул хъанай бияв,
Шяравун уцара тIийна иявхха:
УччинцIа ябитан
буттал аьрщарах,
ХьхьичI-Къурув нанисса
бявкъу щаращух.
ЯбатIин къахъанай, уруглай ияв
ХьхьичIух тIитIи даркьу
щюлли лухччинух.
ХьхьичIра-хьхьичI ккаклаки
суратрах куна,
Яттил ттурзандалух
ялугьлай ияв.
На къумасса чIумал,
дакI рахIат дайва,
Утти щил бусайссар
ттухь нахIу махъру?
На къашай хьунигу,
чIарав авцIуну,
Ттул цIуцIаву вийнна ина ласайва.
Ккаккан аьркинмургу
гьарзад ккарккунни,
Бусан аьркинмургу
гьарзад бувсунни,
Ххира буттал къатри
оьрчIан кьадиртун,
Ахиратрал къатлул
заллугу хьунна.
Бахттун,
ш. ЧукIун
———————————
Хъуннасса кьурчIишиву кIидачIлай, жижара буллай буру Аьбдулкьадирдул арс ХIажи (польский доктор) МахIаммадовлухь, душварахь Мадинахь ва Зояхь, арснахь ХIажинахь ва махъсса гъанчунахь цинявннахьвагу, вайннал аьзизсса
арс
Арслан ва нину Роза
чIун дакъа жуятува личIи шаврийн бувну. Вайннал гьаврду нурданул дуцIиннав, алжан булуннав, махънал оьрмурдай барачат бишиннав.
Аьбдуллул арс ХIусайнов Салауттин ва ванал кулпат
——————————
Хъуннасса кьурчIишиву кIидачIлай, дакIнихтунусса жижара буллай буру жула хIурмат лавайсса
Ширвани Чаллаевлухь ванал ссил душ
Напират
оьрмулул аргъираву лавмартсса цIуцIаврил жуятува личIи баврийн бувну.
Махъминнал оьрмурдай барачат бишиннав. Ванин къабуллумур оьрмулул бутIа махъ ливчIминнан булуннав!
Напиратлул рухI хъинний дишиннав! Алжаннул ххари баннав!
«Илчи» кказитрал коллектив
