Июль зурул 1-нний республикалул ХIукуматрал хъунаманал цалчинма хъиривчу Анатолий Карибовлул каялувшиврийну хьунни агьалинан харжру буллуну, буржру лахъаврил масъалартталсса буллалисса Координационный советрал заседание.

Микку гьурттушинна дунни министерстварттал ва ведомстварттал, прокуратуралул, Пенсионный фондрал вакилтурал. ЗахIматрал ва соцразвитиялул министрнал хъиривчу Мурад Казиевлул бувсунни июньдалул 1-ннийннин республикалий харжирдал бурж (задолженность) хъанай бушиву 41 миллион ва 500 азарда къуруш. Харжру булун багьлай бушиву 1597 инсаннан. Май зуруй харжирдал задолженность хъун хьуну дур «Махачкалаводоканал» ОАО-лул (11 миллион), «Авиаагрегат» ОАО-лул (12 миллион ва 900 азарда къуруш), «Манаскентское» ГУП-рал (3 миллион ва 300 азарда къуруш), зузалтран харжру къабулаврийн бувну. Бувсунни июльданул 5-ннийнин отпускирттайн бувкминнан дулунсса арцу дучIан аьркиншиву бюджет­рал идарарттайн. Анатолий Карибовлул зузалтрал хьхьичIсса буржру лахъансса чаранну ккак­лакисса маслихIатру буллали­сса ихтилат бунни ахирданий.