Дагъусттаннай сийлий дакъар ташурду кьутIирдайну цIакь буваву. 2010 шиная 2015 шинайн бияннин дурагу цIакь дурну дур 475 ташулул контракт, миннувату 65 – ларгсса шинал. 2016 шинал ташулул контракт чичин нотариусрайн бувксса цавагу кулпат бакъар. Аьрасатнаву ташурдал кьутIи цIакь даву цIушиннар, 1995 шинал Семейный кодекс кьамул бувния махъ аьдатравун дагьсса.
«Нотариальная палата Республики Дагестан» нотариусирттал Ассоциациялул специалист Аминат Рамазанова буслай бур, цачIара цалчинмур кьутIи цIакь дуршиву так 2003 шинал, аьмну цуппа зузисса чIумул мутталий 44 контракт чирчушиву ташурду буллалиминнал.
«Ташулул кьутIи цIакь дувай Дагъусттаннай хъунмурчIин цачIу яхъанай чIярусса шинну дурминнал. ЦIуну ташурду буллалисса жагьилтурачIа кьутIи цIакь дуваву сийлий дакъар, чIявуминнан му цукунсса документрив мяълумну кIулнувагу къабикIай. Ташулул кьутIи цIакь даврил лас-щарнил хъус, думур архIалну ккаклакиссар, лас-щарнихь ихтияр дуссар цалвамур бутIагу цаннал-цаннан пишкаш буван.
ТтучIан бувкIуна ттигъанну цачIу яхъанай 50 шин дурсса лас ва щар. Ми бия цаннал бутIа гаманан пишкаш баврил кьутIи ( договор дарения) цIакь дуван бувкIун, на миннан бувчIин бувссия му кьутIи лахъи лагантIишиву, ташулул кьутIи цIакь дуваврийну щарссанилмур бутIа ласнан личIлачIишиву, миннал цанма къулайну, на тIийкун бувна», — тIий бур нотариус.
Ташулул кьутIи даххана дуван ягу лекьа дувангу ласнал ва щарнил кIинналлагу рязийшинна аьркинссар. Аьрасатнал закондалийн бувну, кьутIилий ккаккан буван бучIиссар цачIу яхъанайнува зий ляркъумунил хIакъиравусса, кулпатрал харжлугърал хIакъиравусса пунктру. ЛичIи хьун багьарча, цукунсса бутIа-бачIу бан аьркинссаривгу ккаккан буллалисса пунктгу. Амма мукунсса пунктругу хIисавравун лавсун, ташулул кьутIи цIакь дуван хьхьичIунмай хъанан бувар Дагъусттаннай.
