Уттигъанну Дагъусттаннал виваллил иширттал министерствалул тIайла бувккунни къуллугърал бурж биттур буллай жанну дуллусса зузалтрал оьрчIру – 20 инсан, Бурятиянавун, Байкал бярнил зуманивсса лагерьданийн бигьалаган.
ОьрчIру Бурятиянавусса «Истомино» тIисса дунияллул даражалийсса эколого-образовательный центрданийн гьан бансса икьрал дурну дия Бурятиянал виваллил иширттал министр, полициялул генерал-майор Олег Кудиновлул ва Дагъусттаннал виваллил иширттал министр, полициялул генерал-лейтенант Аьвдурашид МахIаммадовлул, Олег Филиппович Дагъусттаннайн увкIсса чIумал.
ХьхьичI кьини оьрчIругу, миннащалсса нинухъру ва гъан-маччамигу кьамул бунни Аьвдурашид МахIаммадовлул.
— Ххирасса оьрчIрув! Зул буттахъал къучагъшиврий жанну дуллуссар. Зун миннацIа пахру бикIан аьркинссар. Жунгу ми тачIав хъамакъабитантIиссар. Миннал къучагъшиву хъирив нанисса никиран эбратну хьунтIиссар. ДучIантIиссар чIунну зу пахрулий зула буттахъая зулва оьрчIахь бусласисса. Щак бакъар зуяту ххаллилсса буттахъан лайкьсса оьрчIру хьуншиврий. Ва аьрххилий зу кIул хьунтIиссару Аьрасатнал личIи-личIисса регионнаясса оьрчIащал. Ттул умуд бур зу Дагъусттаннал цIа лайкьну дуруччинссар тIисса, — увкунни оьрчIахь, ххуллухъин тIий, Аьвдурашид МахIаммадовлул.
ОьрчIру тIайла буккан бувкIсса ниттихъахьгу, гъан-маччаминнахьгу министрнал бувсунни оьрчIру щалагу аьрххилий виваллил иширттал органнал зузалтрал аякьалулу бикIантIишиву, миннан циняр шартIру дузал дантIишиву. Хьунабакьаврия махъ, министр бакIчину цинявппагу бувккун, къуллугърал бурж биттур буллай жанну дуллусса зузалтрал гьайкалданучIа тIутIив дирхьунни. ОьрчIал ва миннащал бувкIминнал министрнащал бавцIуну рирщунни суратру. Яла оьрчIру, автобусрай щябивтун, бувцунни шагьрулувух экскурсия бан.
