ТIайламур бусан, ва август зурул 12-нний 2003-кусса шинал, хьхьунил ссят мяйнний, Титовлул цIанийсса оьттун ччувччусса кIичIираву оьттух чивчусса таварихрая ссанчIав бакъасса (му иш хьуну махъ, щил ци ихтилат булларчагу, ссанчIав бакъа чIалачIисса буну тIий!) ца-кIива махъ учинна, чичинна тIий, сукку хьусса мугьлатраву, най буна бакIравун бувхсса затну хьуна зунттал халкьуннал дакIнихсса асардаву ца яла язимурну хъанахъисса «Камаллул Баширдуясса бусала».
Му цуппа бусаланияргу, дакIнийн багьуна бусалалуву­сса ахир-мяъналул махъру:

Ва Камаллул Башир
ивкIуссарича,
Тти бигьалагира,
чIухърал агьалий.
Илхъичитал бакъа
илхъив ритира.
Лаххия дакъанма
хъами битира!

«Бигьалагияра», — чин бурив къакIулли жухьва жунмагу – цинявппагу лакрахь. Бигьалагияра, ухлавгуннича ттинин жува чан­сса бухьурчагу яхIливун бичин хIарачат буллай ивкIсса инсан, махъва-махъсса яхIлицIа хьун къабитансса чараннах хьхьугу-кьинигу луглай ивкIсса чув-адамина. РахIатсса ссихI бигьияра, янин чIалачIиния ахьлавгуннича хъинну чIявуссаннахлусса яхIлил бутIа так ца цанмалу буллуну ивкIсса биялалул заллу.
Бивтун утан ца ссятрал хьхьичI жу хьунабавкьуссияв Надирдущал: на ганан ккаккан дуллай уссияв чIал къавхьуну итабакьин хIадур буллалисса, лакку мазрал хIакьинусса тагьарданун хас бувсса луттирал макет. Лу буккантIий буссия август зурул 23-нний хьун най диркIсса, цил хьхьичIунма сипттачинугу цува Надир ивкIсса, лакку мазрал байрандалийн. Му луттирал бакIххуттайнгу лавсун буссия Надирдул цала чивчусса укунсса махъру:
«Гьарца инсаннал увкусса махъ я ганайн цайнма къаршийну кIура баяйссар, ягу ганан мюнпатну бацIайссар.
Лаккучунал лаккучунахь лакку мазрай къаувкусса махъ — щала жула миллатрайн къаршину кIура баллалисса махъри.
Лакрал инсантурал лакрал инсантурахь, лакку мазрай бакъа, цамур мазрай буллали­сса ихтилат – му щала жула миллатран так ца оьбаланур зана бикIлакIисса.
Бачияра бацIан баннуча жула миллатрал ялун нани­сса оьбала».
Лакку маз бухлаган бюхъайшиврул буруккин буллай ия Надир. «Миллатрал яхIлил ттарцI» (вай махъру бия ванал махъсса шиннардий яла чIявуну зумух ласласисса махъруну) лархIуну душиврул дардирдай ия Надир. Миллатрал хасиятрал язи-язими чуллу бурувччуну бакъашиврул балаллий ия даингу Надир. Бурувччуну бикIияра тIий ия Надир жухьва жула ялун нанисса оьбалардая, жуйнма жува биян буллалисса зараллая. Мунан ччай бия ялагу хъинну чIявусса, агьамсса затру буру­ччин, ябан. Буручлайгу ия, ябуллайгу ия, яхI кьацIул бувгьуну, амма хъунмурчIин – цувалу.
Цувалу личIан ивтун тIий бакъарив жущава му яангу къавхьусса. Му буручлай ия жува циняв цалархIал, жущава тIурча цинявннаща му къавхьунни уруччин ца цувалу. Къавхьу­сса куна уруччин ванияр шанна шинал хьхьичI мунала уссу МахIаммад.
МахIаммадгу, Надиргу кунмасса чиваркI миллатрал тарихраву къаляхъайссар ттуршра-кIиттуршра шинаяр чIявуну. Му бувчIинтIиссагу хъунмурчIин жунма бакъарча, жула ялун нанисса никиранни, хIакьинусса жула замана тарихрайн кIура бавну махъри. Гьай-гьай, муниннин, лакку мазгу бухлавгун ба­къану, Надирдул тикрал дуллайннасса «ЯхIлил ттарцIгу» гъюжу къадурккун личIарча.
Къауруччарду жува цал ттигу жула миллатрал язисса арс. Мукун буния махъ, ци банну, туну, бикIийча литIлайнма. Бигьанма чарттаяту бувну бацIан бангу хъанай буния махъ – гьа­ттардил бакIрацI бивщусса чарттаяту. Хъунна хъанай дикIувча хIатталу. ЯхIлил ва яхI ба­къа­шиврул дянивсса дазу чIири личIлачIиссаксса, хъунна хъанай дикIувча хIатталу. Дулунну мунихьхьун лакрал миллатрал мусил лачIан дугьан ккаккан дур­сса язи-язими хъуругу.
Руслан Башаев