Транспортрал, энергетикалул ва связьрал министерствалий баян бунни муххал ххуллул пассажиртурал мурадру бартбигьаврил шартIру къулай даншиврул МахIачкъала шагьрулун булун ккаккан бувну бушиву 24 хъунмасса вагон.

Зулайхат Тахакьаева
«Министерствалийн ччя-ччяни букIлай бур аьрзри, «Махачкала – Москва» маршрутрай нанисса поездрал пассажиртурал мурадру бартбигьаврил шартIру къулай­сса дакъашиврия бусласисса. Мунищалва архIал кIицI бан багьлай бур муххал ххуллул транспортрай архсса маршрутрай пассажиртал ххияврилсса буллай бушиву «Федеральная пассажирская компания» АО-лул.
«Махачкала — Москва» ва «Махачкала — Санкт-Петербург» поездру дузал буллалиссар «Федеральная пассажирская компания» АО-лул Ухссавнил Ккавкказнал филиалданул,» — увкунни министерствалул зузалал.
Ларгсса шинал декабрь зуруй ревизия буллалийни «Махачкала – Санкт-Петербург» поездрай билетру бакъасса пассажиртал ххилаххисса ишру ялун ливчукун, «ФПК» АО-лул каялувчитурал хIукму бувну бур ва поезд компаниялул цамур филиалданухьхьун булун. ДР-лул БакIчи Рамазан АьбдуллатIиповлул «РЖД» ОАО-лул президент Олег Белозеровлуйнсса Федерал пассажирский компаниялул хIукму букьан бувара тIисса оьвчаврих къабурувгун, ва шинал март зурул 1-нния шинмай №397/398 «Махачкала — Санкт-Петербург» поездру буллуну бусса бур ФПК-лул Западный филиалданухьхьун.
Мунищалва архIал март зуруйва ДР-лул ХIукуматрал «ФПК» АО-лул Ухссавнил Ккавкказнал филиалданущал чирчуну дусса дур архсса маршрутирдай пассажиртал ххиявриву уртакьну зун­сса кьутIи. Ва кьутIилийн бувну, «Махачкала — Санкт-Петербург» по­ездру зана битан бюхъан тIий бусса бур МахIачкъалаллал во­го­нный участокрайн. Ва суал ДР-лул Минтрансэнерго­с­вязь­­­рал ххал ­­бив­гьуну бусса бур «ФПК» АО-лул Ухссавнил Ккав­кказ­­нал­мур фи­лиалданущал. ЦIана­сса чIу­мал компания хIадурну дусса дур шамил­чинмур разрядрал пассажирский вагондалул проводникталну зун буцин 18-30 шинал оьрмулувусса 30 инсан.
Минтрансэнергосвязьрал авиациялул, муххал ххуллул ва хьхьирил транспортрал отделданул каялувчи Кьасум МахIаммадовлул бусласимунийн бувну, министерствалул дурну дусса дур дуккаврил идарарттал мониторинг, ца абитуриент МахIачкъалалив дуккин ан (га яхьунсса шартIругу хIисавравун ларсун) ссан ацIан тIий уссарив ххал буллалисса.
Минтрансэнерголул дурсса даврия ва маслихIатирттая балжисса информация биян бувну бусса бур ДР-лул ХIукуматрайн, гихунмайсса хIукмурду кьамул баншиврул.
Мунищалва архIал, поездру зана бан республикалул каялувчитурал ва министерствалул ляхълахъи­сса чараннах къабурувгун, ФПК-лул сводкардаву чIумуя-чIумуйн итталун багьлай бусса бур МахIачкъала шагьрулул вагонный участокрал «Махачкала-Москва» поездрал пассажиртурал мурадру цин лавхьхьуну биттур къабуллай бур тIисса аьрзри.
Кьасум МахIаммадовлул кIицI лавгунни вагонный участок­рал коллективращал хьушиву министерствалул ва «ФПК» АО-лул Ухссавнил Ккавкказналмур филиалданул вакилтал гьуртту­сса хьунабакьаву. Муний цал уттигу коллективрайн оьвкуну бур бусса гужру цачIун бувну, «Махачкала — Санкт-Петербург» поезд зана бан ва гихуннай мукун­сса тагьар хьун къаританшиврул низамрал ялув бацIан.
«ФПК- АО-лул Ухссавнил Ккавкказналмур фидиалданул вагонный парк бизан баврищал МахIачкъалаллал вогонный участокравун 2016 шинал булун дакIний бусса бур 2002-2004 шиннардий бувсса кондиционердащалсса 24 хъунмасса вагон. Ми вагонну та булунтIиссарив мяълумну кIул хьун тIий бусса бур сентябрь зуруй.
Му бакъассагу, республикалий муххал ххуллул транспортрал даврийн багьайсса суаллу чIумуй биттур баншиврул, ДР-лул ХIукуматрал хIукмулийн бувну, сакин бувну бу­сса бур Дагъусттаннал исполнительный властьрал ва муххал ххуллул идарарттал вакилтурая сакин хьу­сса группа.