Къарабудахккантуллал райондалий Талги шяраваллия арх бакъа террористурайн къаршисса операциялуву органнал зузалтрал бат унни 9 боевик. 

А. Аьбдуллаева
7 боевик ца буссарив кIулну бур. Миннавасса ца МахIачкъалаллал бандгруппалул бакIчи ХIусайн ТIагьиров ур.
Гайми: М. ТIагьиров (1988 ш.у.), Т. МахIаммадов (1994 ш.у.), Э. Меджидов (1993 ш.у.), А. Исмяилов (1996 ш.у.), Р. Халилов (1980 ш.у.), Аь. Загьиров (1989 ш.у.). Ца боевик цу уссарив кIул буллай бур.
КIия къачагънаща органнал зузалтрая лихъан бювхъуну бур. ЦIана миннах луглай бур.
Ва операциялул лагрулуву хъиривбагьавуртту дуллай, Новый Параул тIисса шяраву бувгьуну бур кIицI ларгсса къачагътурал кьюкьлун кумаг буллай бивкIсса 2 инсан. Миннаща биялсса ярагъ зевххуну бур.
Спецоперация най бивкIсса кIанттурдай органнал зузалтран лявкъуну бур Калашниковлул 6 автомат ва 2 пистолет. Къачагътуращалсса биту-ххитулуву оьрмулуцIа хьуну ур ФСБ-лул спецназрал зузала, щавурду дирну дур органнал 3 зузалайн.