Дагъусттаннал 2-мур исправительный колониялул зузалт хьунабавкьунни ДУМД-рал кIулшивуртту дулаврил отделданул зузала МухIаммад Майрановлущал. Дуснакьрал зузалтращалсса ихтилатраву МухIаммад Майрановлул кIицI лавгунни дуаь даврил цуксса агьамшиву дуссарив гьарица инсаннал оьрмулуву. — Дуаьлул инсан яхI-намусрава, мяърипатрава уккан къаитайссар, — увкунни ванал.
Хьунабакьаврий мукунма ихтилат бунни 2-мур исправительный колониялул хъунаманал хъиривчу, виваллил службалул подполковник Рамалдан Рамазановлул. Ванал бувсунни ДУМД-рал вакилнахь дуснакь бувминнащал цукун, ци кьяйдардай зун аьркинссарив, чак бан ччиминнан цукунсса шартIру дуссарив. Хъирив МухIаммад Майрановлул ихтилат бунни УИС-рал зузалтрал дянив экстремизмалул пикрирду ппив къахьунсса чаран лякъаврия. Ванал бувсунни буттахъая шихуннай жула агьалинал дуллалисса диндалия, аьдатсса исламрая, дуснакьрал шартIирдай диндалул аьдатру щаллу даврия. Ванал кIицI лавгунни дуснакьирттаву зузиминнахь цуксса бияла буссарив диндалул кIулшивурттайну, цалла эбратрайну вай идарарттай щябивкIми тIайла бацIан бан.
— Цинявппа мукIрусса зат бур диндалул инсан марцI айшиву, тIайласса ххуллийн уцайшиву. Мунияту ва жул идаралий бувну буссар мизит. Дуснакь бувми цаппарасса луттирдая ккалай, кIул буллай бур исламрал диндалия. Колониялул библиотекарттаву буккин ччинан ттуршвахъул луттирду буссар диндалиясса. Амма ва ишираву яла хъуннамур даву дуллай бур Дагъусттаннал бусурманнал духовный управлениялул вакилтурал. Ми ччя-ччяни хьунабакьай дуснакь бувминнащал, хIарачат бувай гьарица инсаннащал цаща-цащала, хаснува дакI рахIат дансса ихтилат аьркин багьлагьиминнащал хьунабавкьуну, дакI данмур, бакIрай бацIан банмур бусан, — увкунни Рамалдан Рамазановлул.
ХIадур бувссар
А. Аьбдуллаевал
