«Дагестан» РИА-лул конференц-залдануву хьунни дачIи шинал дянив (январь-июнь) республикалул ххуллурдайсса тагьар цукунсса диркIссарив ва му ххуй дан ци чаран ляхълай буссарив хIасиллу дуллалисса УГИБДД-лул хъунаманан кIанайсса Евгений Нечаевлул пресс-конференция.

Микку гьуртту хьунни УГИБДД-лул МРЭО-лул хъунама МахIаммад Аьлигъазиев, ДПС-лул отделданул хъунама Атай Алхлавов ва пресс-службалул хъунама ИсямахIаммад Султанов. ДачIи шинал дянив управлениялул дурсса даврил хIасиллу дуллалисса ихтилат бунни Евгений Нечаевлул.
Ванал бувсунни ДТП-тту цирда ва миннуву зарал бивминнал ккал чан даву мурадрай рес­публикалул ГИБДД-лул управлениялул, шагьрурдайсса ва районнайсса подразделениярттал диялсса даву дуршиву.
ХьхьичIмур шинал вара чIумуву хьусса ДТП-тту цIана­нияр чансса диркIнугу, миннуву ливтIуминнал ккал гьашину чан хьуну дур. Ряхва зурул дянив 657 ДТП хьуну дур, миннуву 181 инсан оьрмулуцIа хьуну ур, 963 инсаннайн щавурду дирну дур (хьхьичI шинал 705-226-961).
ДачIи шинал хIасиллайн бувну цирда ДТП-ттугу, миннуву ливтIуми ва бивщумигу хьхьичIмур шинах бурувгун чIяву хьуну бур Къизлардай, Къарабудахккантуллал, УнцIукIуллал ва Казбековуллал районнай. ДТП-ву оьрмулуцIа хьуминнал ккал ххишала хьуну дур Лаващиял, ЦIунтIиннал, Къизилюртуллал районнай ва ДПС-лул личIисса батальондалул къуллугъ буллалисса кIанттурдай. МахIачкъалалив шин дайдирхьуния шихунмай чан хьуну дур ДТП-тту, миннуву ливтIуми ва бивщуми. КIицI ларгсса чIумул дянив МахIачкъалалив хьуну дур 155 авария, миннуву ивкIуну ур 10 инсан, щавурду дирну дур 225 инсаннайн.
ХIасил, вай иширттаву зарал бивсса 100 инсаннава 4 ивкIусса хъанай ур. ХьхьичIмур шинал 10 инсан ивкIуну ур.
ЧIяруми ДТП-тту шупIиртал сававну хьусса дур.
ШупIиртал сававну хьуну дур 570 ДТП. Миннуву ивкIуну ур 163 инсан, щавурду дирну дур 892 инсаннайн. Ми ишир­ттаву хIарчIсса шупIиртал сававну хьусса 17 ДТП дур, цавугу 4 инсан ивкIусса, 25 инсаннан цIунцIияртту хьусса. Вай иширттава 6 ДТП хьуну дур МахIачкъалалив, ца-ца Каспийскалий, Избербашлив, федерал ххуллурдай, мукунна Къарабудахккантуллал, Сергокъалаллал, С. Стальскийл, Къумтуркъалаллал, Лаващиял, Лакрал, Къизлардал ва Нугъайннал районнай.
Шиккува кIицI лаган, хIарчI­сса шупIиртал ашкара бавриву ххуйсса ккаккияртту чIалачIи дунни МахIачкъалаллал, Хасавюртуллал, Каспийскаллал, Лакрал райондалул ва Дагестанские Огни шагьрулул подразделениярттал.
ЧIярусса ДТП-тту хъанай дур мукунна шупIиртал анаварну най бушиву сававну. Анаварну нанисса чIумал ми, хьунив ххуллийн бувккун, цайми машинарттайн щилай бур ягу ахьния багьлай бур: 20% ДТП-ттал (113 ДТП) машинартту леххан бувну нанисса шупIиртал багьана хьусса дур. Миннуву 32 инсан ивкIуну ур, 47 инсаннан цIунцIияртту хьуну дур, 30% цинярда авариярттал (165 ДТП) хьуну дур шупIиртурал цаннаяр ца хьхьичIун буккан кьаст лархIуну. Ми иширттаву 95 инсан ивкIуну ур, 332 инсаннайн щавурду дирну дур. Конференциялий гьаз хьунни ххуллурдай оьрчIан апатIру хъанахъаврил масъала.
ГИБДД-лул зузалтрал кIицI лавгунни гъинтнил каникуллал чIумал оьрчIахсса къула­гъас ххишала дикIан аьркиншиву, ми мудангу хъуниминнал итталу бикIан аьркиншиву, машинар­ттай бувцуну нанисса чIумалгу нитти-буттал оьрчIру мюхчан бансса чаран лякъин аьркиншиву.
Июль барз байбишиннинсса чIумуву хьусса оьрчIру хIаласса 58 ДТП-ву оьрмулуцIа хьуну ур 9 оьрчI, щавурду дирну дур 56 оьрчIайн.
ОьрчIан апатIру хъана­хъавриву хъуннасса аьй ду­ссар нитти-буттайгу. ОьрчIал хьхьичI миннал цалла дуручлай бакъар ххуллул низам. ЧIивисса оьрчIащал ми ххуллу лахълай бур бири-биривнийх. Цивппалу кьатIув бувксса чIумал оьрчIругу мукунма зий бур.
Ххуллурдайсса бала-апатIру чан шаву мурадрай, циняв­ппагу полициялул службардугу кIункIу бувну, ччя-ччяни дуллан аьркинну дур профилактикалул мероприятияртту. Ххуллурдай низамрава бувксса ишру ашкара баврил ялув хъиннува бацIан багьлай бур.
КIанттул шартIру ва тагьар хIисавравун ларсун буллан багьлай бур профилактикалул операцияртту «Пешеход», «Скорость», «Обгон», «Ремень» ва цаймигу.
Аьркинссар мукунма инсантуран бала-апатIру хьусса гьарица ДТП-лул хIакъираву хъиривлаявуртту дурну, багьай­сса хIукмурду кьукьин, хьу­сса ДТП-ттая ва профилактикалул давурттая республикалул ва кIантту-кIанттурдайсса СМИ-дай буслан.
Управлениялул хъунаманал ихтилат къуртал хьуну махъ ГИБДД-лул зузалтрал журналистурал суаллахьхьун жавабру дуллунни.