Июльданул 24-нний хьунни махъра-махъсса «Чиндир­черо-2016» цIанилусса щала Аьра­сатнал жагьилсса бакIчитурал форумрал кьини. Гьашину шанна шин хъанай дур Ахъушиял райондалийсса ХiинтIиял шяраваллия арх бакъасса «Чиндирчеро» базалий ва форум батIлай.

Гьашинусса форумрал ляличIишивугу щала Аьра­сатнал даражалул форумну баян бувну бивкIшиву дур. Форумрал махъра –махъсса кьинилул давриву гьуртту хьусса республикалул миллатирттал иширттал министр Тать­яна Гамалейл кIицI бувунни, цал министерство хIадурну душиву зун республикалул оьрмулуву чялишну гьурттусса жагьилтурал сакиншиннардищал, мукунна хIадурну душиву цачIусса проектру ххал дигьлан ва ми щурущи дуллан .
Форумрал сакиншинначитурал тавакъюлий бувсса цила ихтилат Татьяна Владимировнал хас бувну бия Дагъусттан Республикалул Конституциялул Кьинилун. Шикку ванил чIурчIав дурунни Аьрасатнал ва Дагъусттаннал Конституциярду байбихьлай бушиву миллатирттал интересру буруччаврия.
«Дагъусттан Республикалул агьаммур Закондалул дур ца цинна лархьхьусса хасшинна-мугъаятсса ва цакуцсса буругаву тIалав дуллай бур республикалий ялапар хъанахъисса хъуни миллатирттах ва цалла чичру дакъасса, цалва лугъатирттай гъалгъа тIисса мюрщи миллатирттах. Мукун бикIангу аьркинссар демократия дурурччусса паччахIлугъирттай»,-увкунни ванил.
ДР-лул Миллатирттал иширттал министерствалул дуллалисса агьаммур цалла давуну чIалай дур мазрал политика щурущи дуваву. Масалдаран, 2015 шинал министерствалул хIадур дурну дур Дагъусттан Республикалул мазрал политикалул Концепция, дурну дур Ниттил мазурдил республикалул фестиваль, тIивтIуну бур ­Оьрус мазрал ва культуралул центр ва цаймигу мероприятияртту. Мува куццуй, ларгмур шинал министерствалул сипталий итабавкьуну бур Дагъусттаннал 14 миллатрал мазурдийсса кутIасса разговорникру. Вай давуртту министрнал бусаврийну, 2016 шиналгу най ду­сса дур. Мукунма Татьяна Гамалейл чIурчIав дурунни, жула региондалий миллатирттал, диннал дянив­сса иширттах хIукуматрал чулуха­ссагу къулагъас ххисса душиврий. Бувсунни миллатиттал дянивсса дусшиврул арарду цIакь даву мурадрай республикалий цала щурущи дурсса «Куначество», «Дагестанцы в судьбе России», «Колыбельные народов Дагестана» ва цаймигу проектирдая.
БатIаврий мукунма гьуртту хьунни Ахъушиял ва Къайта­гъуллал районнал бакIчитал АхIмад МахIарамов ва Аьлим Темирбулатов.

З.АьбдурахIманова