Уттигъанну ДР-лул строительствалул, архитектуралул ва ЖКХ-лул министр Ибрагьим Казибековлул кьамул увну 5 инсан, миннал мурадирттах вичIидирхьуну, цащава шайсса кумаг бувунни ми щаллу бан.

З. АьбдурахIманова
МинистрначIан бувкIсса халкь бия МахIачкъалалиясса ва Буйнакскалиясса. Буйнакскалия увкIсса АдивлахIажи Жалбаев хъунма­сса тавакъю буллай ия цал шагьрулий щинал масъала щаллу буван къахьунтIиссарив тIий. Министрнал ванал тIимунин жавабран бувсунни, республикалий мукун­сса давурттан цалсса арцу итадаркьуну дакъашиву. МахIачкъалалив яхъанахъисса Авгъаннал дяъвилул гьурттучи Аьбдуразакь Аьли­евлул тавакъю бия ипотекалун субсидия ккаккан бувну бакъа­ссарив, бухьурча, цан му багьан бан къабюхъантIиссарив тIисса. Ибрагьим Казибековлул миккува цала пишакартурайн амру бувунни ва масъала бакIрайн ласун ва баян бувунни цал ялув ацIаву дувантIишиву. Мукуна министрначIан увкIун ия утти­гъанну Аьлибек Аьлиев телевидениялущал увкIун ивкIсса Перова 11 адресрай 9 зиву дуллалисса лахъкъатрал строительствалул заллу Тажуттин МахIаммадов. Къатри дуллай бусса бур МахIачкъалаллал пассажиртурал авто-предприятиялул аьрщарай. Ибрагьим Казибековлул ванал тIимунин жавабран бувсунни судрал къадагъа дирхьушиву къатри дуллан ва бивхьумур гьанугу, чIирттугу лекьан буван кка­ккан бувну бушиву. «Къатри дан хьхьичI гьарнал ихтияр дуллалисса, хIукуматрал чулухасса рязишинна дикIан аьркинссар», — увкунни министрнал.