Июль зурул 26-нний жура кIицI лагару республикалул паччахIлугърал байран – Дагъусттаннал Конституциялул Кьини. 1994 шинал ва кьини Конституционное Собраниялул кьамул бувссия Дагъусттаннал цIусса конституция, 26-мур июльгу баян бувссия Конституциялул Кьинину, щаллагу республикалул байранну.

П. Рамазанова
1994 шинал Конституция кьамул баву хьуссар республикалий демократия ва низам цIакь дуллалисса шану. Му Конституциялул проектраха зий бу­ссия Дагъусттаннал Верховный Советрал Конституционная комиссиялул члентал, ХIукуматрал къуллугъчитал, аьлимтал-правоведтал, квалификация ларайсса юристътал. Тания махъ, 9 шинал лажиндарай, Дагъусттаннал ва Аьрасатнал политикалуву, оьрмулуву хъунисса дахханашивуртту хьунни, мунияту 2003 шинал июль зурул 10-нний цIусса Конституция кьамул буван багьссия. Мугу кьамул був­ссия июльданул 26-нний, хьхьичIва кьамул бувмур конституциялущал дахIаву душиву исват буван кунма. 2003 шинал кьамул бувмур Конституциягу хъанахъиссар республика цIакьну низамрай дарцIусса душиву чIалачIи буллалисса шану, граждан общество хьхьичIуннай дувавричIансса хъитну. Дагъусттаннал Конституция хъанахъиссар инсаннал ва гражданиннал ихтиярду дуручлачи­сса агьаммур законну, Аьрасатнал Федерациялул субъект хIисаврай Дагъусттан Республикалул статус цIакь дуллали­сса гьануну, ПаччахIлугърал властирдал органну, кIанттул самоуправлениялул органну ва жаваблувсса къуллугъир­ттайми зун аьркинссар Конституциялул тIалавшиннардацIун бавкьуну. Инсаннал ва гражданиннал мурадру ва ихтиярду дуруччавриву Конституциялул бияла хъунмассар, Конституциялул паччахIлугърай бурж бихьлахьиссар гьарцагу гражданиннал мурадру ва ихтиярду дуручлан, инсаннал цIуллу-сагъшиврулсса буллан, политикалул ва жяматийсса оьрмулул иширттавух му хIала шаврицIун кабакьлан.
Жу дакIнийхтуну барча буллай буру Дагъусттаннал агьали Республикалул паччахIлугърал байрандалущал, чIа тIий буру низамрал ххуттайсса ххарисса оьрму, экономикалуву хьхьичIуннайшивуртту, давурттаву тIайлабацIуртту!