Мубараксса Рамазан барз. Щаллара бусурманнал дуниял Зумарду дургьусса, цумацагу бусурманчунал Аллагьнал ххуллий цала кашилун лав­хьхьусса хъинбалартту, чирилун­сса давуртту дан ялув буллалисса барз. Амма … ХIайп! Гьашинугу оьттул гъулугъин бунни Аллагь ххирасса Рамазан барз Да­гъусттаннай. Ца уттигу дагъусттаннанлувтал банд лаган бансса, республикалул цIаний ттангъа рищунсса вахIшисса тIул!

Жува вардиш хьуну бияв полицанал зузалт, журналистал, диндалул ишккаккулт рахIму бакъа литIлатIаврий, хIатта мубараксса зуруйгума. Шанна шинал хьхьичI Рамазан барз байбивхьусса кьини оьрмулуцIа увссия жул коллега, машгьурсса журналист АхIмаднаби АхIмаднабиев. Ва базилух тIурча ка гьаз дурунни Дагъусттан дунияллул гъун­ттулу машгьур бувсса, хIакьинусса кьинигу дуниял хIайран дуллалисса «Лезгинка» ансамбльданул балетрал ца яла ябацIанма артист Исамудин Раджабовлуйн. Гьунар ххисса, бакI-чурххал исвагьисса, симан нурданул лархънасса жагьил!
Махъ бакъа, полицанал зузала ур оьрмулухун суру хъарайх бивщуну заназисса инсан. Журналистналмур пишагу бур вярттул ишан лархIунмасса, бакIрайн ттархьру гьарзану щилащи­сса. Амма щин ци оьбала був­ссар дагъусттанналминнацIун чIяву-чIявусса кьатIаллил билаятирттал тамашачитурал­ссагу дакIру ясир дурсса ххаллилсса къавтIалал? Щил ххуллу кьувкьуссар Да­гъус­ттаннал Халкьуннал артистнал? Аькьлу-кIулшилуща лаласун бюхълай бакъар.
Исамудин гъанну кIулми буслай бур ва дакIнил бутIа тIивтIусса, хъяйнасса, гьарцаннал чIарав ацIан хIадурнувасса, цинявппагу артистурал ца уссин кIанттайсса, цува кIулминнал дакIурдиву дахIалай чинсса кIану бувгьусса инсан уссия, тIий.
Ттуна Исамудин гъанну кIул­ну къаивкIхьурчагу, ванал бивкIу хъинну бювххунни. Цанчирча республикалул магьирлугърал усттартурал му­къурттийну учин, Дагъусттаннал къавтIаврил магьирлугъраву акъа чара бакъасса, цала пишалийн дакI тIайласса, гьунар ххисса къавтIалая, балетмейстръя ва.
Низам дуруччай органнал бусласимунийн бувну, Исамудин ивкIуну ур 18 шинавусса жагьилнал. 32 чIила щуну дия тIар. Миннува 18 – къюкIлийн! КъюкI рикIирах кунна дурурсуну дия тIар.
Бусласаврийн бувну, оьттулучунал ппу цува увкIун усса ур арс полицалийн мукIру хьун увцуну.
Щалва творчествалул интеллигенция бувккун бия хъунасса артист уччин, жаназалущал нанисса машинарттал ва инсантурал кьюкьлул ахир чIалай да­къая, тачIав къаккавкссия инсан уччин гайкссава агьлу бувккун тIий чичлай бур Исмудин кIулми соц-сетирдаву. Дащуй дихьлай бур ва оьсса тIул. Цала оьрмулул 42 шин там хъанахъисса кьини хIавтIливух ишин нясивну лявкъуну бур Исамудиннун. Алжаннул ххари анхьуви.
Зулайхат Тахакьаева