ДакIнийн бичавурттал ва ххажалатрал кьини

ЦIуссалакрал райондалий ЦIуссачIурттащиял шяраву ДакI­нийн бичавурттал ва ххажалатрал кьинилун хас дурсса митинг.

Ва жула тарихраву пашман­сса мугьру кьабивтсса кьинилун хас дурсса митинграйн «Радуга» детсадрал хIаятраву кIюрххицIунма був­ккун бия садикрал коллектив, оьрчIру ва миннал нину-ппу. Митинг дайдирхьунни бусалардавун агьсса Юрий Левитаннул чIунийну Хъунмасса Буттал КIанттул цIанийсса дяъви байбивхьушиву бусласисса радиорепортажрайну.
Яла итабавкьунни «Священная война» тIисса балай.
Митинг къуртал хьуну махъ шиккун бавтIцири лавгунни гьашину ЦIуссачIурттащиял шяраву тIиртIусса Ватан дуручлай бивкIминнансса гьайкалданучIан ттугъру ва тIутIив ларсун. Шикку абадлий лархъсса цIарачIа бивхьунни тIутIал шалкри ва гьаз бувну бия Ххувшаврил ттугъ.
Ва кьинисса митинграй гьур­тту хьунни ЦIуссачIурттащиял шяраваллил администрациялул хъунаманал хъиривчу НурмахIаммад НурмахIаммадов, Райондалул депутатътурал собраниялул председатель Мавлидин Исламаьлиев, шяраваллил администрациялул зузалт, культуралул ва кIулшивуртту дулаврил ва цаймигу идарарттал зузалт.
Цала ихтилатраву НурмахIаммад НурмахIаммадовлул кIицI лавгунни 1941 шинал июнь зурул 21 кьини му билаятрал тарихраву ца яла пашманмур кьини душиву.
— Ва кьинилул жунма дакIния гьан къабитай Ватан дуручлай жанну дуллуми, фашистурал ясир бувгьуну азурда бувми ва дяъвилул шиннардий ккашигу, захIматгу бухIан къабювхъуну ливтIуну лавгми. ХIакьину жува дакIнийн бичлай буру тай кьянатсса, захIматсса дяъвилул шиннардий Ватан дуручлай бивкIсса цигявппагу агьалий. Миннал къучагъшивурттан бивкIу бакъассар ва ми абадлий дакIний личIантIиссар, — увкунни НурмахIаммад Нурма­хIаммадовлул.
Анжела АхIмадова