Июньдалул 24-нний ДР-лул ХIукуматрал Председательнал хъиривчу Шамил Исяевлул ва Ухссавнил Ккавкказуллал ишир­ттал министрнал советник Ризван ГъазимахIаммадовлул ххал дунни кIира хъунисса инвестпроект цукун бартдигьлай бурив.

ХIасан Аьдилов
БакIрай ми лавгунни «Дагестанские новые технологии» ОАО нефтеперерабатывающий заводрайн. Тикку хъамал кIул хьунни заводращал, ганил итадакьаймунищал. «Дагнотех» бур ттизаманнул производствалул комплекс, мивун бухлай бур нефтепереработкалул завод, шинай 1 млн. тонна переработкалул дайсса. Ганил комплексраву дур аьркинсса инфраструктура ва ттизаманнул автоматизация. Комплекс буллай байбивхьуссар 2011 шинал, яла бацIан був­ссар, 2 шин лях ларгукун цIунилгу буллан бивкIссар. Ва объект буллай бур частный инвестортурал арцух.
Заводрал производствалул директор Енгибар Мамедовлул бувсунни предприятиялул давурттал хIакъираву. Ризван ГъазимахIаммадовлул дунни цаппара замечанияртту.
Муния махъ делегация лавгунни «Югагрохолдинг» ООО-лийн. Тикку буллай бур теплицардал комплекс, геотермал щин ишла дуллай (лухччинува нани­сса щин). Комплекс бур Къумтуркъалаллал райондалий, ганил лагру хьунтIиссар сайки 20 гектар.
Проектрал куратор Шарип Шариповлул мукъурттийн бувну, комплексравун бухлай бур 5 теплица ва 0,5 гектар сервисрал зоналул. ХIакьину технологиялул щаллушиву хIисавравун ларсун га хъанахъиссар Дагъусттаннай яла ххуймур теплица.
«Строительствалул хIасиллан хасну холдинграл дирекциялул пландалий бур ца квадрат метралия ласаван 40-45 кило бакIлахъиялул. Аьрасатнаву кIинтнил теплицардаву ца квадрат метралия ласайссар 37 кило, интнил теплицардаву – 7-8 кило. Ва проектрал ляличIишиву хъанахъиссар теплицарду геотермал (кIирисса) щинал гъили буллалаву», — увкунни Шариповлул.
Шамил Исяевлул бувсунни теплицарду гьашинува зун аьркиншиву ва ссуттил дугьан ахънилсса.
Кураторнал мукъурттийн бувну, цIанасса ппурттуву «Агрохолдинг» ООО зий бур проектрал кIилчинмур бутIуха, тикку буллай бур 6,5 гектарданийсса теплицарду. Яла гъан­сса чIумуву ласун тIий бур аьркинсса кьай-кьуй ва ца зурувату байбишин тIий бур ахънил­сса дугьлай.
Шариповлул мукунма бувсунни Югагрохолдинграл Да­гъусттаннайгу, Аьрасатнал кьиблалул регионнайгу буллай бушиву сендвич-панеллу итабакьайсса заводру. Ми зий байбишин тIий бур яла гъансса чIумуву. «Жул пландалий бур помидорду ва нисварти бахлан. ХIакьину жучIа дур качирчусса кьутIирду помидорду ва нисварти машан ласаврил хIакъираву. Производствалул лагру ва масштабру хIисавравун лавсун, жул проектрал хъуннасса агьамшиву дур Дагъусттаннайгу, билаят­рал кьиблалул регионнайгу. Жу сакин буллай буру жулва даврил опыт лахьхьайсса школа», — увкунни Шарип Шариповлул.
Ва проектрал хъунмасса асар биян бантIиссар виваллил рынок­райнгу, муния кумаг хьунтIиссар жулла республикалий ахънилсса кьюкьин давриву.