Оьрус мазрал ва Пушкиннул кьинирду кIицI лагайсса июньдалул 6-нний МахIачкъалалив Поэзиялул театрданул хIаятраву аьдатравун дагьсса шеърирдал шадлугъ хьунни. ХIасил, ва кьини, 1799 шинал июньдалул 6-нний, Москавлив увссар хIакьинусса кьинигу щалла дунияллий ккалаккисса, личIи-личIисса миллатру цачIун бувсса, гьантта ляхну ацIвахъул мазурдий таржума уллалисса, Александр Сергеевич Пушкин.
З. АьбдурахIманова
1997 шиная шиннай Пушкин увсса кьини жулва билаятрай кIицI лагайссар хIукуматрал байрандалул даражалий. 2011 шиная шиннай ва кьини кIицI лаган хIукму хьуссар Оьрус мазрал кьини хIисаврайгу.
Поэзиялул мажлис тIитIлай, театрданул хъунмур Елена Гьаруновал бувсунни хъунасса шаэр увсса кьини шикку ттинингу цимиллагу кIицI ларгшиву.
«Ва хIаятравун батIлатIаврил аьдат жучIа ччянияцIа дуссар. ХIаятравусса гьайкалгу дирхьуну дур 1937 шинал, шаэрнан 100 шин хъанахъисса иширан хасну. Гания шинмай хьхьичIва шикку бивкIсса библиотекалул, утти театрданул, хIаятравун бучIайссар поэзиялул вакилтал, Пушкиннул творчество ххирами», — увкунни ванил.
Хъирив шадлугърай махъ лавхъунни ДР-лул культуралул министр Зарема Буттаевал.
«ДакIнийхтуну барча буллай бура зу укун агьамсса ва мяъна-мурад хъуннасса байрандалущал. НахIакьдан дакъар Республикалул БакIчинал сипталий бувсса ва театрданун «От Пушкина до Гамзатова» тIисса цIагу дирзсса. Цанчирча, ми кIиягу шаэр ккаллийну уну тIий Аьрасатнал поэзиялул бюхттулсса къалардан. Умуд буссар жула литературалуву яргсса ва чаннасса цIарду ттигу ляхъантIишиврийн», -увкунни ванил.
Министрнал мукунма, Р. АьбдуллатIиповлул чулуха циняв барчагу бувну, тIутIал кацIру бивхьунни А. Пушкиннул ва Р. ХIамзатовлул гьайкаллачIа.
Шикку мукунма гьуртту хьунни ДР-лул Чичултрал союзрал, республикалул театрдал ва библиотекарттал вакилталгу, жагьилсса шаэрталгу. Вайннал бувккунни чIявучин ххира хьусса А. Пушкиннул шеърирду, поэмардавасса ва магьравасса бутIри.
Мура хьхьуну театрданул сахIналий ккаккан бувунни шаэрнал «Медный всадник» произведениялувасса музыкалул ва поэзиялул спектакль. Хъиривмур кьини, июньдалул 7-нний, театрданул тамашачитуран «Евгений Онегин» произведениялул моноспектакль ккаккан бувунни.
