Ларгсса нюжмардий жулла республикалул хъуншагьрулий хьунни Регионнал дянивсса ирглийсса ювелирный выставка «Золото России» — «Мир камня».
Бадрижамал Аьлиева
XI «Золото России» — «Мир камня» выставка тIитIлатIисса батIаву хьунни июньдалул 2-нний Р. ХIамзатовлул цIанийсса Миллатрал библиотекалул выставкарду дай залдануву. Му тIитIлай, ДР-лул туризмалул ва халкьуннал художествалул пишардал министрнал хъиривчу ХIусайн АхIмадовлул цалва ихтилатраву чIурчIав дунни Дагъусттан мудангу бивкIшиврий кару мусилсса усттартурал минану, республикалий бушиврий хъинну чIявусса канил пишардал къушру. Цайминнуя къатIий, ссал багьари Бархъаллал ва Оьргърал усттартурал каруннил дурмур, цийгу жулла республикалул дазул кьатIув, архну, машгьурсса.
Хъирив махъ лавхъсса ДР-лул Машлул ва промышленностьрал палаталул президент Бадруттин МахIаммадовлул барчаллагь увкунни Республикалул выставкардал «Дагестан-Экспо» центрданухь, укун хъуннасса, республикалул экономика хьхьичIуннай давриву ва инвестициялул климат бакьин бавриву агьамсса кIану бугьлагьисса даву щаллу даврихлу.
Прикаспийскаллал пробирный надзорданул паччахIлугърал инспекциялул начальник Сяид МахIаммадовлул кIицI лавгунни укунсса журалул даву Аьрасатнал циняв регионнай къашайшиву, так канил пишарду итххявхсса, халкьуннал художествалул промыслардал авадансса республикарттай дакъа, кризисрал тагьарданий укунсса выставкарду дуван бюхъаврилгу ва аралул хъунмасса бучIантIимуния бусласишиву.
Ккаккиялун дирхьуну дия ювелир индустриялувусса махъра-махъсса цIушиннарду. Мукунна ичIура ишла дувайсса матахI, заргалтурал цалла давриву ишла дувансса кьай-кьуй, антиквариат ва чIярусса цаймигу хъус. Гьарца шинал кунма, выставкалувух гьуртту хьунни Аьрасатнаву ва мунил кьатIув цIа ларгсса брендру: «Адамас», «Аквамарин», «Александрит», «Русское золото», «Драгоценности Якутии», «Электрум» ва чIявусса цаймигу.
«Золото России» — «Мир камня» выставкалул лагрулий хьунни Дагъусттаннай ювелир даву хьхьичIуннай даврин хас бувсса «ккуркки стол». Му сакин бунни ДР-лул Туризмалул ва халкьуннал художествалул пишардал министерствалул. Му байбихьлай, ХIусайн АхIмадовлул бувсунни ва аралуву Минтуризмалул дуллалисса давурттая, билаятрал цайми шагьрурдащалсса уртакьшиврийсса зузаврия, республикалул каялувшиндарал щаллу дуллалисса проектирдая.
