МахIачкъалалив лахъсса даражалий тIайла дурккунни 1-мур ОМОН-далул МахIачкъалаллал бригада сакин бувну 25 шин бартлаглагисса юбилей.
Шадлугърал мажлис байбивхьунни аьпалул хьусса зузалтран дацIан дурсса гьайкалданучIа тIутIив дишаврийну.
Къуллугърал бурж биттур буллай къучагъшиврий жанну дуллуми абадлий дакIний бикIантIишиву исват бунни ва кьинисса мажлисрайгу.
ОМОН-далул зузалт байрандалущал барча бан бувкIун бия МахIачкъала шагьрулул бакIчи Муса Мусаев. Цалва ихтилатраву мэрнал дакIнийхтуну барчаллагь увкунни Ватандалул цIаний дакI марцIну къуллугъ буллалисса зузалтрахь, кIицI ларгунни миннал къуллугърал захIматшивуртту, дакIнийн бивчунни аьпалул хьусса зузалт. Хъирив цалва къуллугърал бурж дакI марцIну биттур буллалисса зузалтран шагьрулул бакIчинал дуллунни ХIурматрал грамотартту, барчаллагьрал чагъарду ва бахшишру. ОМОН-лул кьюкьлувун цIуну кьамул бувминнал хъа бунни Ватандалийн дакI тIайлану къуллугъ булланшиврий. Ва кьини хьхьичIунсса зузалтрал хъазамраву шадлугърал даражалий ларчIунни личIи-личIисса медаллу. ОМОН-далул зузалтралгу ккаккан бунни цала пишалул даража, кьянкьа-кьурчIишиву, ярагъуннищал ва техникалущал занакьулу бикIан кIулшиву, каруннай бияврил бюхъу-тяхъа.
Шиккува бусан, ОМОН-далул цалчинсса подразделенияртту сакин дурну диркIссар 1988 шинал октябрь зурул 3-нний Совет Союзрал 12 шагьрулий.
МахIачкъалалив ОМОН-далул гьану бивзун бур 1991 шинал июнь зурул 4-нний. Вай кьюкьравун кIункIу бувну бивкIссар милицанал зузалтрава яла гьунар буми, Дагъусттанналгу, жулва агьалиналгу цIаний жандалий хIайп къаувкуну цIаравун ххяххан хIадурми.
ХIакьинусса кьини вай кьюкьраву 20-хъайсса миллатрал инсантал бур ца кулпат кунма куннал ку бувгьуну, жяматийсса низамрал ва агьалинал мюхчаншиврул къаралданий бавцIуну.
ОМОН-далул зузалтрал хъуннасса хъар лахълай бур ярагъуннил балгусса кьюкьрайн къарши бацIавриву. Вай гьуртту хъанай бур захIматсса тагьар хIасул хьусса иширттаву (ЧС-ву), цимивагу хасъсса операцияртту бувну бур ОМОН-далул зузалтрал гужирайну.
Дагъусттаннал аьрщарай укун кьянкьасса, дакI тIайласса арсру буссаксса, жулва халкьуннаща паракьатну шанан бюхъайссар.
ХIадур бувссар
А. Аьбдуллаевал
