ДГУ-раву хьунни «Историческая память о Великой отечественной войне в воспоминаниях и документах» тIисса элмийсса конференция. Ганий гьуртту хьунни университетрал преподавательтал, студентътал ва мукунма республикалул элмийсса ишккаккулт ва тарихчитал.
ХIасан Аьдилов
РАН ДНЦ-лул ИИАЭ-рал Дагъусттаннал цIусса ва новейшая историялул отделданул хъуна-хъунама элмийсса зузала Гъани Каймарасовлул бувсунни дяъвилул яла захIматмур чIумуя – хъун дяъви байбишайсса иширттая. Аьлимчунал увкусса куццуй, та чIумал щинчIав кIулну къабивкIссар циксса ЯтIул Аьралуннал саллатI ясир бувну бивкIссарив душманнал, цанчирча та чIумал муния буслан ва чичлан къадагъа диркIссар.
«Хъунмасса Буттал КIанттул цIанийсса дяъвилул так цалчинми зурдардий фашистътурачIан ясирну багьну бивкIссар жулва 3,5 млн. саллатIнал ва укунмасса инсантурал. Цинявппагу немецнал ясир бувну бивкIссар сайки 5,7 млн. Совет Союзрал инсантурал. Балжисса цифра къакIулссар», — увкунни аьлимчу Каймарасовлул.
Хъун дяъвилий дагъусттаннал халкьуннал ккаккан бувсса гьунардая ва къинттуллух дуллай бивкIсса давурттаяту бувсунни ДГУ-рал профессор М. Мирзабековлул.
Хъун дяъвилул личIи-личIисса бутIрая ихтилатру бунни мукунма Аьрасатнал историялул кафедралул профессор Людмила Труженниковал, гава кафедралул доцент Надежда Исяевал ва цайминналгу.
