МахIачкъалаллал каялувшиндарал ца яла бакI цIуцIимур масъалану хьуну бур цаппара баччибакъасса заллухъруннал бири-биривний къатри дуллалисса масъала. Гьантта ляхну шагьрулул администрациялул пишакартал буккайссар чув-ци стройка най дуссарив кIул хьусса кIанттурдайн.
З. АьбдурахIманова
Республикалул БакIчи Р. АьбдуллатIиповлул тIалавшиндарайн бувну, шагьрулул администрациялул къулагъасралун ларсун дуссар ихтияр дакъасса кIанттурдай къатри дуллалаврин къадагъа дишаву.
2003 шинал Редукторный поселокрайсса Кьяркьарал бярницIухсса аьрщив дарххуну дусса дур. Ванийн бувну, инсаннал цIуллу-сагъшиврун дару-дармансса кьяркьи дусса бярнил лагма дурну дур ва дуллайнма бур чIярузивурду дусса къатри. Ми къатравасса канализациялул бургъурду, щищакIуй ихтияргу къаларсун, тIайланма бивхьуну бусса бур бярав. Чапалсса щинал хъунмасса зарал биян бувну бур дарувран ишла дувайсса диркIсса кьяркьаравусса микроэлементирттан. Ва ца зарал бакъасса, цуппа бяргу чIиви ливчIун бусса бур.
Гьашину мартрай Рамазан АьбдуллатIиповлул, шагьрулул бакIчи Муса Мусаевлущал Ак-Гел бярнил ва Кьяркьарал бярнил лагма-ялтту увккун, тавакъю бувну бур мугьлат бакъа шикку дуллалисса къатрал давурттив дацIан дан. БакIчинал чIурчIав дурну дур бярдал зумардай халкь бигьалаглансса, щябикIансса паркру, скверду буван ва бярдал экосистема цIулаган дан аьркиншиврий.
ХьхьичIра дарххуну диркIсса аьрщарал хIакъираву судрал къуллугърайн тIайла бувккун бур искрал аьрзри. МахIачкъалаллал администрациялучIасса Градостроительствалул ва архитектуралул управлениялул бусаврийн бувну, Кьяркьарал бярницI кадастрданул сияхIрайн лавсъсса 29 аьрщарал парча бусса бур. Миннува 17 аьрщи дусса дур, 2011 шинал цIудурсса кадастрданул сияхIрайн бувну, чIярузивурду дусса къатри дан ихтияр дуллусса. 7 аьрщи дусса дур 2003 шинал кадастрданул сияхIрай офисру ва строительствалул хъус дишинсса складру буван ихтияр дуллусса. ЦIана вай 7 аьрщарал хIакъираву шагьрулул администрациялул Лениннул райондалул судрайн искрал аьрзри буллуну бур. Мура шинал дарххусса 5 аьрщарал хIакъиравугу судрайн аьрзри булунсса хIадуршинна най дусса дур.
