Жяматийсса инфраструктура лядуккан даврин хасъсса кIанттул мяъна дусса масъалартту щаллу бавриву муниципал сакиншиннардан кумаг баву мурадрай, ДР-лул ХIукуматрал кьамул бувну бур 2016 шинал апрельданий «О реализации на территории Республики Дагестан проектов местных инициатив» тIисса хIукму.
ХIасан Аьдилов
Га хIукмулуву цIакь дурну дур кIанттул сиптардал проектру (проекты местных инициатив) дузрайн дуккан дансса субсидияртту ласаврил низам. Ми давуртту щаллу даврин хасъсса Конкурсрал комиссия сакин бувну бур. Комиссиялувун бухлахиминнал батIул дайссар республикалул муниципал сакиншиннардал кIанттул сиптардал проектру, ми проектру бартдигьинсса субсидиярду ласуншиврул. Мукунма цIакь бувссар Конкурсрал комиссиялул хIакъиравусса Положениягу.
ДР-лий кIанттул сиптардал проектру бартлагаврийну бюхълай бур кIанттул цилакаялувшиврул органнангу, агьалинангу кумаг хьун агьамсса масъалартту щаллу буллан.
ДР-лул Экономикалул министерствалул гьашину апрельданул 25-нний бивкIсса «О мерах по реализации постановления Правительства Республики Дагестан от 25 апреля 2016 года № 110» тIисса хIукмулуву цIакь дурну дур конкурсраву гьуртту шаврин хасъсса документирттал сияхI, конкурсраву гьуртту шаврил хIакъиравусса заявкалул форма. Му хIукму сияхIрайн лавсун бур ДР-лул Юстициялул министерствалий.
