Вай гьантрай жулла республикалий арулчин хьунни дунияллул халкьуннал дянивсса фольклорданул ва аслийсса культуралул фестиваль «Горцы». ДакIнийн бутан, «Горцы» фестиваль жулла республикалий дувайссар кIира шинай цал.

Бадрижамал Аьлиева
Ва фестиваль дуллалиссар ЮНЕСКО-лул эгидалулу, Да­гъусттан Республикалул БакIчинал чIарав ацIаврийну. Фестиваль хьунни «Культура России (2012-2018 годы)» Федерал целевой программалул ва Зунттал шинал лагрулий.
Фестивальданул гьантрай дунни личIи-личIисса шадлугъру. Миннувух гьуртту хьунни респуб­ликалул чIярусса районнаясса фольклорданул коллективру, миннувух лакралми районнаяссагу, Аьрасатнал регионнаясса ва чил хIукуматирттаясса коллективругу.
Фестивальданул цалчинмур кьини дия шадлугъирттал авадан­сса. Му кьини хьунни оьрчIал художествалул творчествалул фестиваль «Маленькие горцы», мукунна фольклорданул парад, «Межкультурное сотрудничество как средство достижения мира» цIанилусса конференция.
Дунияллул халкьуннал дянив­сса «Горцы» фестиваль тIиртIунни оьрчIал къавтIаврил, балай учаврил, инструментирттал, фольклорданул коллективирттал. Фестиваль оьрчIал коллективирттал тIитIавриву цичIав махIатталсса бакъая, фестивальданул дайдихьугу щаллагу дунияллий кIицI лагай­сса ОьрчIру буруччаврил кьинилийн тIайла дарцIунавхьур.
Фестиваль тIитIаврищал ва ОьрчIру буруччаврил кьинилущал бавтIми барча буллалисса махъру лавхъунни ДР-лул культуралул министр Зарема Буттаевал, МахIачкъала шагьрулул бакIчи Муса Мусаевлул, Кулпат, нинушиву ва оьрчIал ихтиярду дуруччаврил уполномоченный Интизар Мамутаевал. СахIналийн бувккунни ЦIуссалакрал райондалиясса коллектив «Эдельвейс», «Маленькие горцы» Гумбетовуллал райондалиясса, Нугъайнал райондалия­сса «Карлыгаш» ва чIявусса цаймигу коллективру. Ва кьинисса концерт­рал чIалачIи бунни махъа нани­сса никиран, уттизаманнул балайрду ва къавтIавуртту дакъассагу, ххирану душиву аслийсса халкьуннал культурагу.
Гихуннай фестиваль дачин дунни чил хIукуматирттаясса коллективирттал: Мексиканавасса, Шри-Ланканавасса, Словакиянавасса. Ми шагьрулувух бувккунни, мини-концертру дуллай, фольклорданул парадрай.
«Межкультурное сотрудничество как средство достижения мира» цIанилусса конференциялий тIурча, хьунни ихтилатру культуралул уртакьшиврийсса зузаврия, фольклорданул ирс машгьур баврил цIу-цIусса кьяйдардаясса ва журардаясса. Миннуясса докладру бунни искусствоведтурал, Респуб­ликалул Халкьуннал творчествалул къатлул пишакартурал, культуралул ва искусствалул зузалтрал. Конференциялул давривух мукунма гьуртту хьунни Аьрасатнал ПаччахIлугърал Халкьуннал творчествалул къатлул дунияллул халкьуннащалсса дахIавурттал отделданул начальник Андрей Беляев ва Пермь шагьрулиясса режиссер-постановщик Юрий Николаев. БавтIминнахь ча бувкру тIисса, ДР-лул культуралул министр Зарема Буттаевал цIаниясса ихтилат бунни мунил хъиривчу, РДНТ-лул директор Марита МухIадовал. Махъру лавхъунни чил билаятирттаясса коллективирттал каялувчитурал: Словакиянавасса Эмил Яцкол, Мексиканавасса Алехандро Коронадол ва Шри-Ланка жазиралиясса Сунил Даянандал.
Фестивальданул давривух гьашину гьуртту хьунни Жамаллул цIанийсса Дагъусттаннал художествалул училищалул студентъталгу. Шеърилугърал театрданул хIаятраву хьунни му училищалул 1-мур курсирал студентътурал пленэр, яни кьатIув, гьавалий, тIабиаьтрал чаннай ва шартIирдай сурат дишаву.
Официал тагьарданий VII Дунияллул халкьуннал дянив­сса фольклорданул ва аслийсса культуралул «Горцы» фестиваль тIитIлатIисса шадлугъ хьунни июньдалул 2-нний Оьруснал театрдануву. Мунивух гьуртту хьунни ДР-лул ХIукуматрал председательнал цалчинма хъиривчу Анатолий Карибов. Мунал жулла респуб­ликалул хъамаллурахь ча бувкру тIисса махъ лавхъунни Республикалул БакIчинал, Халкьуннал Мажлисрал ва ХIукуматрал цIанияту. Республикалул зунттал аьрщив хьхьичIуннай давриву гьашину баян бувсса Зунттал шинал бугьлагьисса кIанттуйгу чIурчIав дуллай, кIицI лавгунни гьунар бусса, ярг-яргсса коллективирттал гьунардал миллатрал аьдатру, багьу-бизу, зунттал халкьуннал щихачIав къалархьхьусса культура дуруччавриву агьамсса кIану бугьантIишиврийн умуд бушиву. Фестивальданущал барча буллалисса телеграммарду дия Аьрасатнал Федерациялул ПрезидентначIасса культуралул маслихIатчи Владимир Толстойл, ЮНЕСКО-лул иширтталсса бувайсса Аьрасатнал Федерациялул Комиссиялул жаваблувсса секретарь Григорий Орджоникидзел, Аьрасатнал ПаччахIлугърал Халкьуннал творчествалул къатлул директор Тамара Пуртовал цIардаясса. Миннуву кIицI лавгун бия ва даражалул фестиваль дурагу ца душиву Ухссавнил Ккавкказнаву, Аьрасатнал культуралул оьрмулуву ва агьамсса иш хъанай бушиву, чIявусса миллатру ялапар хъанахъисса Дагъусттангу нахIакьдан язи къабувгьушиву ва лагрулул фестиваль дуван.
Гихуннай ккаккан дунни «Дагестан встречает гостей» цIанилусса гала-концерт. Мунивух вайми районнавух гьуртту хьунни Ккуллал райондалиясса фольклорданул коллективгу.
Вара кьини Оьруснал театр­данул чIивимур залдануву хьунни халкьуннал музыкалул инструментру бищаврил «Играй, душа!» цIанилусса конкурс. Мунивух гьуртту хьунни Лакрал райондалиясса халкьуннал инструментир­ттал ансамбльгу. Музыкалул аьдатру лайкьну дуручлачаврихлу ва коллектив лайкь хьунни дипломран.
Оьруснал театрданул хьхьичIсса майданнив хьунни Аьрасатнал халкьуннал аслийсса культуралул центрдачIасса халкьуннал искусствалул усттартурал выставкагу. Ванил цал ххишалагу тасттикь бунни цуксса авадансса ва жура-журасса буссарив жулва халкьуннал канил пишарду.
Гьашинумур фестиваль дуллай бур 2 этIапIрай: июньдалул 1-6-нний фестиваль дуллай бур лавай кIицI лавгсса чил билаятирттаясса коллективру ва Дагъусттаннаясса 40-ннийн бивсса коллективру гьурттуну; июльданул 25-29-нний – Азирбижаннавасса ва Аьрасатнал 10 региондалиясса коллективир­ттал гьурттушиврийну. Фестивальданул программалувун бухлай бур конференцияртту, парадру, миллатирттал аьдатирттая, аслийсса культуралиясса видеофильмрдал презентацияртту, пагьламантурал байран, халкьуннал музыкалул инструментру бишлашиминнал конкурс, «Поэзия народного костюма» фестиваль, халкьуннал балай учаврил «Дагестанские родники» конкурс, «Россия – родина моя» гала-концерт ва м.ц.
Июньдалул 3-нний «Горцы» фестивальданул чил билаятирттаясса хъамал ва жулла республикалия­сса гьурттучитал бивунни Дарбант шагьрулийн, Нарин-Къалалингу. Миккугу хьунни хъинну хъунна­сса яргсса концерт.
Гайми кьинирдай мукуннасса концертру хьунни Избербаш шагьрулийгу, Хъунзахъиял ва Лаващиял районнайгу.
Июньдалул 4-нний «Поэзия народного костюма» цIанилусса байран хьунни Оьруснал театрдануву. Мунийн увкIманаща бюхълай бия, жулла республикалул миллатир­тталми янна-калий бакъасса, чил билаятирттая бувкIсса хъамаллурал миллатирттал костюмирттайгу тамаша буван.
Фестивальданул шадлугъру щаллу хьунни Оьруснал театрдануву хьусса хъуннасса концерт­райну.