Нажагьсса ухьунссар инсан цал ухьурчагу ккарччал хIакин­начIан къалавгсса, стоматологнал бикIу, пародонтологнал бикIу кумаг аьркин къабагьсса. ЧIявур хIакьину жучIава стоматологиялул клиникардугу. Цумурди язи бугьан?
Гьай-гьай, къулайсса, рахIатсса шартIру думур, ххирасса, ххуй­сса ттизаманнул оборудование думур, яла-яларив, пишакаршиврул даража лавайсса, кару мусилсса хIакинтал бумур.

Андриана Аьбдуллаева
Дахадаевлул цIанийсса кучалийсса (№82) DEHTAL HOUSE тIисса профессионал стоматологиялул центр тIивтIуну личIину хъунмасса хIал къавхьунугу, цинярда ттизаманнул шартIру дусса клиникалия ва цалла даву ххуйну кIулсса жагьил­сса хIакинная ччяни кIул хьунни агьалинан. Щардал шярава­сса МахIмудов Ширвани, мяйжаннугу, даву канилух дурксса, кIулшивуртту дусса хIакин ур. Ва цувагу чIярусса шиннардий Да­гъусттаннал ФСИН-нул управлениялий зузисса чIявучин бусрав­сса лаккучу Рамазан Ширваниевичлул арсри. Ширвани, ххуйсса пишакар ушивруцIун, пациентнал хIурмат бусса, мяърипат ду­сса жагьилгу ур.
2010 шинал, Дагъусттаннал медакадемия къуртал бувну махъ, Ширвани лавгун ур дуклан Москавлив. Шикку РУДН-ву цалчинсса квалификациягу ларсун, цалва пишалий зун ивкIун ур Тюменнал областьрай Сургут шагьрулий. Сургутрай зий 4 шингу дурну, зана хьуну ур Дагъусттаннайн. Шикку профессионал стоматологиялул Центр тIивтIуну зий ца шин хьуну дур.
ХIакьину ва центрданий агьалинан ккарччацIун дар­хIу­сса цинярдагу журалул хIаллих­шиннарду дуллай бур. Хъин дуллай бур ккарччив, синтту, дихьлай бур имплантру ва протезру. Му бакъа­ссагу, шикку чIявуми укунсса клиникардай къадувайсса плазмолифтинггу дувай. Центрданий, хъуними бакъасса, мюрщисса оьрчIругу кьамул буллай бур.
Шиккусса гьарица оборудование дур дазул кьатIатусса, Американавасса, Германнавасса.
— Шинай кIийлла Москавлив шайссар стоматологиялул выставкартту, гьарица аппаратура жу ми выставкарттая ласайссар, — тIий, буслай ур Ширвани.
КIира-шанна зивулийсса чаннасса, гьарта-гьарзасса къатраву бур гьарица аьркинмунил дузал­сса стерилизациялул, хирургиялул (хъуниминнансса ва оьрчIансса), терапевтнал кабинетру. Шиккува бур рентген-кабинетгу. ЧIявуми инструментру цал ишла бай­сса бур. Инсантал ца кIанттая ца кIанттайн гьан къабуллай, цинярдагу хIаллихшиннарду шиккура дуваву мурадрай, ялувмур зивулий тIивтIуну бур протезру бувайсса ккарччал техникалул лаборатория. Шиккун увкIсса гьарица инсаннал дуцIин дайссар анкета. Ми анкетарду ядувай­ссар Центрданул компьютерданул базалуву. Муниягу хъунна­сса бигьа-рахIатшиву дур пациентътуран. Ми цимурцаннуцIун яла аьркинмур дур хIакиннал пишакаршиву. Ширванигу, цинявппа ванащал зузисса пишакарталгу – оьрчIал хIакин, терапевт — пародонтолог, ортодент ва цаймигу цалла даву ххуйну кIулсса зузалт бушиву ккавкхьунссар уттинин ва центрданийн бувкIминнан. Ца шинал лажиндарай, цаннан цаннал маслихIат буллай, вайксса стоматологиялул клиникарду ва кабинетру бусса МахIачкъалалив, вайнначIа салкьи хьунни биялсса клиентътал. Букъавсун къабучIир, ва Центрданий зузисса хIакинтал цалва пишалул даража гьаз бан ччя-ччяни лагайссар личIи-личIисса семинардайн ва мастер-классирттайн дазул кьатIув, мукунма Москавлив, цIанихсса хIакинтурачIан.
— ХIакьину жагьилсса хIа­кинтураву хъунмасса гъира бур ххишаласса кIулшивуртту ласун, цIу-цIусса затру кIул хьун, — тIий ур Ширвани. Ккарччал хIакин хIисаврай инсантуран цукунсса маслихIатру бавияв цIувххукун, Ширвани ур гьарица инсаннан дачIи шинай цал чара бакъа хIакинначIан бучIаван аьркин­ссар профилактикалул осмотр дан тIий. Инсаннал виваллил органнал цIуллушивугу ккарччал цIуллушиврия хъар хъанай дур. Мунияту гьарица инсан цала ккарччал цIуллу-сагъшиврул ялув ацIан аьркинссар. Цумур духьурчангу азар цIубутIуй хъин дан бигьассар. Бухьхьияра ва центрданийн. Шиккусса хIакинтурайн вихшала диширча, зу къабяйкьинтIиссару.
Профе­ссионал стоматологиялул центр DEНTAL НOUSE зузи­ссар гьарица кьини кIюрххил ссят 9-нния байбивхьуну ссят 21.00-ннийн бияннин.