Гьашину Дагъусттаннал кIинтнил даэрдай кIи дутлай бивкIун бур 1 млн. ва 546 азарва яттил хIайвандалул. Ми бакъасса, кIинтнил даэрдай бивкIссар сайки 226 азарва лухIи гъаттара ва 3500 балчан. Мунил хIакъираву бувсунни ДР-лул Минсельхозпродрал прессалул къуллугърал.
ХIасан Аьдилов
ДукIу республикалул хозяйствартту хъаласса лазундарал щаллуну къадиркIссар. КIинтнил даэрдайсса ризкьи лазундарал щаллу бувну бивкIун бур 50 процентрал. ХIадур дурну диркIун дур 102 азарда тонна,
214 азарда тонна хIадур дан кIанай. Масалдаран, кIинтнил даэрдал Бабаюртуллал зоналий хIадур дурну дия аьркинссаксса лазундарал анжагъ 74%, Къизлардал зоналий – 52%, Къизилюртуллал зоналий – 56%, Кочубейллал ва Бакресуллал зонардай – 33%, Дарбантуллал зоналий – 15%, Уланхоллал зоналий – 19%.
Циняв зонардавату яла чIярусса лазуни думур бур Бабаюртуллал зона. Ва зоналий дия 82 хозяйство. Амма ва зоналул цаппара хозяйстварттаву кIинтнил даэрдал тагьар лащинну дия. Масалдаран, тай хозяйстварттаву бакъар скотомогильникру, фермарду дур антисанитарсса тагьарданий.
Чансса ххуйну кIинтнийн хIадур хьуну дия Къизлардал зоналийсса хозяйствартту, амма тиккугу хъала лазундарал щаллушин дия анжагъ 56 процентрал, яни аьркинссакссаннул дачIиксса лазуни. Тикку щин дишайсса аьрщивгу лащинну ишла дуллай бур, мелиорациялул тагьар ххуйну дакъашиву сававну.
КIинтнил даэрдал тагьар шиная шинайн хъин чулиннай даххана хъанай дакъар. Тикку экологиялул тагьаргу зия хъанай дур.
КIинтнил даэрдал республикалул управлениялул каялувчи ХIасан Жяъпаровлул мукъурттийн бувну, мадарасса тагьарданий хIадур хьуну бия кIинтнил чIумалнин Къизилюртуллал зоналийсса хозяйствартту, тикку дур 11 райондалул 80-нния лирчусса хозяйствартту.
Ганалва бувсунни даэрдай чIиру баврил тагьарданиятугу. «Дарада-Мурада» СПК-лул (Гергебиллал район), Аьлиевлул ва Хизроевлул цIанийсса СПК-рдал (Ххунзахъиял район), «Кегерский» ва «Согратль» СПК-рдал (Гъуниннал район), «Гидибский» СПК-лул (Шамиллал район), «Панах» КФХ-лул (Ахъушиял район), Орджоникидзел цIанийсса СПК-лул (Лакрал район) лавсун бур пландалий ккаккан бувсса чIируннал 97%.
