Ссу – ПатIимат, щарсса – ПатIимат, душ – ПатIимат.
На патIиматикалул элмурдал докторда.
Расул ХIамзатов

Хъунасса Шаэрнал тIийкун, ванал хъирив вайва махъру тикрал бувансса жучIава лагмава чансса бакъахьунссар, хъиннува чIявусса бухьунссар «ва элмулул кандидатъталгу», бюхъай лякъин «патIиматикалул академикталгума». Ванил бусласи­ссар ПатIимат тIисса цIа жучIара чIя­руну дизайсса, ца кулпатравугума тикрал хъанахъисса, гьарцаннан ххира­сса ва бусравсса цIа душиву. Ттулла ниттилгу (аь.б.), шяравусса жулва махIлалий гьарца кулпатравугу дусса, шяравугу чIявуссаннал дусса ва уттигу дизлайннасса, циняв лакрангу ххира хьусса цIанил хIакъиравусса бувчIинбаву дуван ччива ва макьалалуву.
ФатIима тIисса цIа (аьрабнал цалчинмур слог лахъи бувну зумух ласайссар) Аьрабнава дур­ккуну, дин-исламращал ппив хьуну, машрикь-магърибрайгу, цаймий билаятирттайгу ва цIа миналул хьуну дур. ЖучIара Дагъус­ттаннай ва цIа дур гьарца миллатрал дизайсса цIардаву, дур кIани-кIанттурдай чан-кьан­сса дахханашивуртту хьуну хIа­сул хьусса, цирдалусса цIар­ду кунна цIакь хьусса вари­ант­ругу: ПатIима, ПатIина, ПатIи лакрачIа ва яруссанначIа; БатIи­мат, БатIина даргиячIа; Фатума, Фату лазгиячIа; Фатма къу­мукьначIа ва мукунна цаймийгу. ЛакрачIа ишлану дур ПатIимат тIисса цIа хьхьичIмур слог ла­хъи бувну учайссагу, махъмур слог ла­хъи був­ну учайссагу. Дур му­кунна ПатIу (цалчинмур слог лахъи бувну ва кIивагу слог кутIану учайсса), ПатIина, ПатIимату, ПатIа, БатIа, ПайтIма ва цаймийгу вариантру. Пикри бансса кIану бур аьрабналмур цIаничIан яла гъанмурну хъанахъисса ПатIима тIисса вариант гъумучиячIа хьуна къадакьаву!
«ФатIима (فاطمة) аьраб мазрай «ккуккулия личIан бувмур» (отнятая от груди) тIиссар. Ва цIа диркIссар МахIаммад-идавсил (с.аь.с.) ва Ххадижал (р.А.аь.) душнин, мунияту машгьурнугу диркIссар Бусурман Машрикьрай», – тIий бур аьлимтал (Ургу: Э.Я.Сафаралиева. Как тебя зовут? – Махачкала: Даг. кн. изд-во, 1994; А.Г.Гафуров. Лев и Кипарис. – Москва, Наука, 1971; Б.А.Аджаматова. Мусульманские имена и их значения. – Махачкала, 2000; Т.Гаджиева, В.Львов, С.Задов, О.Савельева. Тайна твоего имени. – Махачкала, 1991 ). Шикку кIицI ларгсса цIанил мяънагу, ванил машгьуршиврул сававгу циняв аьлимтурал кьамул дурну дур, ца зумату кунна тикрал дуллайгу бур.
«ФатIимал (аьраб зумувну чичланнуча) ниттил цIанил мяъна ( Хадижа خديجة) аьрабрай «бувтусса, чIун дияннин був­сса оьрчI» (выкидыш) тIисса духьувкун, пикри багьлай бур вай цIардаву ца цукуннивсса дахIаву, уттигу мяълум хьун дурасса цирив ца хIисав духьунссар, тIисса», — чичлай ур Аь.Гъапуров. Вай пикрирду Аьлим Гъапуровичлул хъирив цаймий ономастътуралгу кIицI бувну бур. Амма, вай цIардал цаннищал цаннил­сса дахIаврих вайннил мяънардаву (ккуккулия ливчIусса ва чIун дияннинва бувсса тIисса) луглан­сса аьркиншиву дакъассар. Цанчирчан, Ххадижал (Хадижа бинт Хувайлид خديجة بنت خويلد‎‎) цилла ниттингу цIа диркIссар ФатIима. Туну цилва душнин цилла ниттил цIа дизавриву ци ссигъа бикIан аьркинссарив?!
Му бакъассагу, МахIаммад-идавс (с.аь.с.) цувагурхха «патIи­матик» ивкIсса. Щарнил ни­ттил цIа дакъассагу, буттауссил Абу ТIалиблул щар­ссанин, мукьийлчинсса са­лихI­сса (праведный) халипа Аьлил ниттин цIагу диркIссар ФатIима (ФатIима бинт Асад бин ХIашим). Аьлил ссурахъугу бивкIссар ФатIима (ФатIима бинт ХIамза) тIисса, ФатIима цIа диркIссар ­Аьлил ­уссил Аькьилал (Аькьила ибн Абу ТIалиб) щарссанингу. КIийл­чинма халипа Оьмардул (Абу ХIапис Уьмар ибн ал-Хаттаб ал-Аьдавий ал-Кьурайши) бивкI­ссар ФатIима тIисса ссу, ваналва душ ФатIима хъанахъиссар МахIаммад-идавсил щарнил ссу (ХIаписатлул ссу). (Разий Аллагьу аьнгьум – Аллагь рязий хьуннав цIарду кIицI лавгмийнная цинявннаявагу).
ЧIалачIиссаксса, ислам дихьиннингу, хIакьинусса кьининин щалва тарихравугу ПатIимат (ФатIима) тIисса цIа хъанай дур яла хьхьичIунмий ва машгьурмий цIардал цану.
Утти ихтилат банну ва цIа­нил мяъналия. Ванил мяъна, чIявусса ономастикалун хас бувсса лу­ттирдайгу гъалатIну чивчусса куццуй, «ккуккулия цув личIан бувмур [оьрчI] » (отнятая от груди) дакъарча, тIайласса таржума хъанахъиссар «ккуккулия цил личIан бувмур, цил кку­ккулия [оьрчI] личIан бувмур» (отнявшая, отлучившая ребенка) от груди). Яъни, ва махъ ккуккулия личIан бувсса оьрчIайн къачай­ссарча, ккуккулия оьрчI личIан бувсса хъамитайпалийн чайссар. Гьаннайсса, шикку чIуручIаву дуллалиссар хъамитайпалул нинушиврул тIабиаьтрал агьамшиврий. Хъамитайпалул цилла щаллушиву, биял шаву, камилшиву тамам хьушиврий ккаллий дан бучIиссар, агар цилва оьрчI аьркинссаксса хIаллай ккуккулий ттихъин бувну, дукралул щаллу шайсса оьрмулувун бивсса чIумал ккуккулия личIан бувхьурчан ( Ургу: «фатIама» — отнимать (ребенка) от груди; фитIам(ун) – прекращение кормления (ребенка) грудью. Арабско-русский словарь Сост. Х.К.Баранов Москва, I962). Ми­ккун бияншиврул душнин аьркинну бивкIссар хъунма хьуну, вирищар хьун, щар хьун, оьрчIан хьун, чIумуйн бивукун оьрчI буван, кIирарагу шинай оьрчIал ккукку ттихъин буван, яъни ганил оьрчI цIуллуну яхьун аьркинну бивкIссар. Га чIумалли ганийн вихшалану «фатIима» – цилва оьрчI ккуккулия личIанцIа хъунма бувмур – учин бучIисса. Вана укун, ФатIима тIисса цIа дизаврийну нитти-буттал цалва душнин оьрмулуву оьрчIая талихI ккаккансса бучIанмур бакIрайва чIакуну, цIанивува цIакь бай­ссар.
Алексей ХIажиев