Май зурул 14-нний Дарбантлив Крепостная кIичIиравусса 5 зивулийсса къатраву ххалбигьавуртту дуллалисса шагьрулул ОВД-лул, участковыйтурал ва уголовный розыскрал хъуними тIайла бавцIуну бур 5-мур зивулийсса къачагътал бусса квартиралийн. Къачагътурал полициялул зузалтрал чулухуннай граната руртун дур.
Къачагътурайн къарши бавцIусса биту-ххитулуву полициялул 17 зузалайн щавурду дирну дур. КIия инсан – Тюменная увкIсса СОБР-лувасса 33 шинавусса полициялул капитан Виктор Тимофеев ва Дарбантуллал ОВД-лул уголовный розыскрал хъунама, 39 шинавусса полициялул капитан Муса Мусаев къачагътурал граната лирчусса чIумал щавурду дирну оьрмулуцIа хьуну бур. Виктор Тимофеев къуртал хьуну ур Дарбантуллал азарханалий. Муса Мусаев къачагътурал ширишилун увгьуну ур. Органнал зузалтрал, му къуртал хьусса кIул шайхту, къачагътал бусса къатрайн гьужум бувну бур. Спецоперация ххуллун кьини маркIачIан чIумал къуртал хьуну бур. Хъирив кьини лекьа-пIякьу хьусса къатраву Муса Мусаевлул ва ца боевикнал жаназа ляркъуну дур. Спецоперациялуву оьрмурдацIа хьусса кIиягу зузала тахсиркаршивурттан ва терроризмалун ххуллу кьукьлай хьхьичIвагу цикссагу мероприятиярттавух гьуртту хьуну, каялувчитурал чулуха личIи-личIисса бахшиширттан лайкь хьуну бивкIун бур. Муса Мусаевлул ва Виктор Тимофеевлул каялувчитал ва даврил уртакьтал кьурчIишиву кIидачIлай бур вайннал гъан-маччанахь.
Дарбантливсса спецоперациялуву бат увну ур тIий бур 4 къачагъ. Силистталул органнал полициялул зузалтрал оьрмурдайн кьаст лархIусса иширал хIакъираву уголовное дело сукку дурну дур (ст. 317).
