Ларгсса нюжмардий, зу кунма, нагу ццах багьну бивкIра, аьрщи сукку хьунтIиссар, аьрасатнал аьлимтурал 2016-2017-ку шиннардий Дагъусттаннай аьрщи сукку хьунтIишиву баян бувссар тIисса хаварду гьаз буваврия.

Мунил сававгу хьуна май зурул 14-нний Дагъусттаннай чIири-хъунсса (Аьрасатнал элмурдал академиялул Геофизикалул службалул Дагъусттанналмур филиалданул баян бувсса куццуй, 4,5 баллданул гужрайсса) аьрщи сукку хьу­сса хъюлчу-кIутIулул нигь рутаву. Халкьуннавун нигь дагьаврия буруккин бакъами булувкьуна социал сетирдай, авай, 1970 шиналгу гьамин май зурул 14-ннийри 9 баллданул гужрайсса, шагьрурду пасат бувсса аьрщи сукку шаву хьуну диркIсса тIий. Аьщун куннасса дахIаву дур 46 шинал хьхьичI хьусса бала-мусиватрайн число тIайла дацIаву тIисса къакрурду хъинну аькьлу бусса, куртIсса хаварду кунма буслай. ХIатта хъирив хьхьуну гужсса аьрщи сукку шаву хьунтIиссар, чара бакъа хьхьу кьатIув рутияра тIисса маслихIатру буллалисса «ванга­хъулгу» чан бакъая. Щукрурхха, Аллагьу Тааьланал цIими бунни укунмагу бала- мусиватсса ишир­ттал ххутIаща итххяххан къахъанахъисса дагъусттаннал агьалинай. Амма дакIурдиву лирчIунни къакрурдал ва варсагъирттал чарсса. Агьалинал сси ва зид. Аллагь Тааьланал кьисасри ласласисса тIисса хаварду. Ва яла-яларив, мурикьай зун хъинсса, бакьай бувссания тIисса цаппараннал сситтул ва пух-пусурданул чIатIаракIру. Буниялттунгу, тIабиаьт гьулусан хьурча, бала-апатIру яла бувгьуминнал бакIурдичIан бучIайшиврий мукIрусса база-мискинтал. Щинни кIулсса? Цумари тIабиаьтрал тIюпандалуща ххассал шайсса мукунний? Ва ттул цалчинмур гургар, ттулва буруккинттарал ххуржинттава личин дурсса.
Щаллара дуниял гъалгъатIутIи дурсса «Евровидение» конкурсрал хIакъираву ссихI къаду­ккан къабучIир. ЧIявусса бия му танийва политикалул конкурс хьунни, тамашачитурал лахъва-лахъмур балл (361 балл) ккаккан бувсса Аьрасатнал балайчи Сергей Лазарев цалчинмур кIану булун лайкь хьуссия тIий. ТIайламур бусан, ххари хьура мунан шамилчинмур кIану булаврия. Укунмагу кьянат бувксса Аьрасатнал билаятран ссан аьркинссар хIат-хIисав дакъасса арцу хъиривмур «Евровидениялун» харж дуллан? Лазарев цалчинману увкссания, булукьинтIиссия дунияллий утти­нин щилчIав къадурсса шоу дуванну, дуниял хIайран дуванну тIий, хIадур хъанай. ДакIний бурив, Дима Билан ххув хьувкун цуксса ххирану дарцIуна мунал ххувшаву? Яла ххирамур шоу дурссия халкь бялахъан буван, дунияллий ганиннин тачIав, цавагу билаятрал къабуккан бувссаксса харжгу бу­ккан бувну. Авай, бюхттулсса державалул сий гьаз дуванну, Европа банд лаган буванну тIисса мяъналий. Бугьарасса къари-къужран духIиндарайсса пенсия бишин, мюрщисса оьрчIру хъин буван дакъасса арцу, билаятрал ххазналуву дялахърурдан, шоурдан лякъай. Москавлив, бюхттулсса державалул хъуншагьрулийгума, захIматсса азардал бас буллали­сса къашайшалт хъин хъанахъи­сса азарханардай, кризис дур тIий, уква даруврал ца гургарагу дуллай бакъар. Жан вилгу дукки, жагьаннама къашайшалтгу тIисса тагьар дур тIий бур циняв, щинчIав цичIав исват къабулланна. Мурадгу му бакъар. СсихIрагу къаду­кканна Сириянавусса дяъвилиягу, Къиримнаягу, цайми-цайми къадагъасса темардаягу. ХIукуматрал бюджетрава шоурдан итадакьлакьими арцур ттунгу, зунгу ратIух нанисса. Гьаманки ратIух… Ттун, зу кунмасса пукьарасса граждантуран хасну ци хIазри, ци хайрди ми шоурдая? Булунмур кьукьирча бакъасса, миннул ттун ччатI къабулай. Я нава Аьрасатнал гражданка бушиврул пахрулул асар къабутай. ДакI пахрулул асардал гьузиххан дуллансса давурттив цайми дуллан аьркинни. Халкьуннан мюнпатрансса. Личин дуваннакьай ххаришивугу ттулла ххуржинттава. Нава МахIачкъалалив яхъанай бунугу, Каспийскалийн нажагь бакъа къалагайнугу, ххари хьунна МахIачкъалалия Каспийскалийн троллейбусру занази буван­сса цIусса линиялуха зий байбишаврия. МахIачкъалаллал троллейбусирттал управлениялул хъунама инженер Фузулу Фузулаевлул баян бунни цIусса маршрут сентябрь зурул 1-нний тIитIинтIишиву, рес­публикалул бюджетрава ми давурттан аьркинссаксса арцу личIи дуршиву ва цIусса троллейбусру машан ласунтIишиву. Ва буниялттунгу агьалинансса къулайшиннар, МахIачкъалалив чIявуну лага-бучIайми ва линиялия ххари хьунтIиссар. Автобусру щапI куну халкьуннал бувцIуну бикIай тIий бур МахIачкъалалия Каспийскалийн автобусирттай лага-бучIайми. Ва миннансса ххаришиврул гургар. Жува вихшалдарай бикIанну ххуйми хаварду баллан­ссар, ххуйми давурттан ххуллурду булланссар тIий.