АЬВДУССАМАДЛУЛ АРС ЛАГИЕВ МАХIАММАД-ТIАГЬИР
Мартрал 14-нний, 90 шинал оьр­мулуву, ахиратрал хьунни цалва бу­сса оьрму Дагъусттаннал халкьуннал цIуллу-сагъшиврун хас бувсса лавайсса даражалул хIакин, захIматрал ветеран, ххаллилсса, дугърисса зун­тталчу, Аьвдуссамадлул арс Лагиев МахIаммад-ТIагьир. Увну ур МахIаммад-ТIагьир ГьукIурдал шяраву 1926 шинал, мартрал 23-нний, жяматраву хIурмат бусса Аьвдуссамадлул кулпатраву.

АцIва оьрчI бусса хъунма­сса кулпатравасса хъуна-хъунама МахIаммад-ТIагьирдуща бювхъуну бур дяъви къуртал хьу­сса тай захIматсса шиннардий МахIачкъалалив мединститутравунгу увххун, ЯтIул дипломращал га къуртал бан.
МахIаммад-ТIагьирдул цалва захIматрал ххуллу байбивхьуну бур Избербашлив больницалий хIакинну зий. Арулла шинава тIалав увну, зун ивкIун ур Каспийскалий Санэпидстанциялий (СЭС) хъунама хIакинну. Ялагу 5 шинава, 1964 шинал, мукуна тIалав увну, ивтссар Дагъусттаннал хъунама санитар хIакинну ва санитариялул масъаларттаха зузисса министрнал хъиривчуну. Кьунияхъайсса шиннардий Дагъусттаннал хъунама санитар хIакинну зий МахIаммад-ТIагьирдул ккаккан бувссар цува хъинну грамотнайсса, кьянкьану цалва мукъуй ацIайсса, бакIрайн ларсъсса даву чулийн ду­ккан дайсса, хъинну захIмат ххирасса, хьхьичI цаятура, хъирив зузалтрая тIалавшинна дусса хIакьсса зузала ушиву.
МахIаммад-ТIагьирдул хьхьичI­ва-хьхьичI цува лавгун цIуцIаврил дайдихьу дусса кIанттурдайн, вилаххавра цIуцIаву лещан дансса чаранну лякъайва, тачIав цаманал хъачIунттайнгу даву къадутайва. Дагъусттаннай холералул цIуцIаву вилаххавра духлаган дурну тIий (1970-ку шиннардий) ванан дуллу­ссия цIа чирчусса мусил ссятгу.
Министрнал хъиривчуну зузисса шиннардий мединститутравугу зий уссия, шиву гигиеналул кафедра тIитIин хIарачат бувссар. ХIакьинусса кьинигу мединститут_раву хьхьичIун ливчусса 10 студентнал ласайссар ванал цIанийсса стипендия.
ДакIнийхтуну ва марцIну бивхьусса захIматрахлу МахIаммад-ТIагьирдун дуллуссар «Орден Почета» ва «Орден Красного знамени», лайкь хьуссар Хъун дяъвилуву ххув хьуну 70 шин шаврил юбилейрал медальданун. «Отличник здравоохранения СССР», «Заслуженный врач СССР», «Заслуженный врач ДАССР» цIардан ва чIярусса хIурматрал грамотарттан, наградарттан.
Му бакъассагу, МахIаммад-ТIагьир ия яхI-къирият дусса, дакI-аьмал уздансса, гьарцаннащалагу хIал бавкьусса инсан, мунияту бусравну, хIурмат буну икIайва цаламинналгу, чилгу дянив.
Аьпа баннав ххаллилсса чувнал тIий, дакIнийхтуну жижара буллай, кьурчIишиву кIидачIлай буру ванал арснахь, душнихь, уссурссуннахь, гъан-маччанахь, агьлу-авладрахь цинявннахьвагу. Цал гьав нурданул дуцIиннав, алжаннул ххари аннав. Махънал оьрмурдай барачат бишиннав. Амин!
ГьукIурдал жямат

—————————

ХIУСАЙНХIАЖИНАЛ АРС МАХIАММАДОВ ШАХВАЛИ
Вай гьантрай хавар бакъа ялун бивсса бивкIулул бат унни ххаллилсса чукIначу, ХIусайнхIажинал арс МахIаммадов Шахвали. Шахвали увссар 1952 шинал мартрал 1-нний ЧукIуннал шяраву хъудугьул кулпатраву.

Ванал нитти-буттал ХIусайнхIажинал ва Таибатлул ряхва оьрчI хъунигу бувну, ххуйсса тарбиягу дуллуну дур. 1969 шинал Ккур­ккуллал дянивмур даражалул школагу къуртал бувну, Шахвали строительный техникумравун увхссар. 1970 шинал лавгссар аьралуннаву къуллугъ бан. Армиялия увкIун махъ къуртал бувну бяличIан бувсса техникумгу, хIукуматрал тIайла ув­ккун, лавгссар зун Моздокрайн.
1976 шинал увхссар «Дагводстройрайн». Зий ивкIссар нормировщикная тIайла хьуну, автоколонналул хъунаманайн иянцIа. Гания махъ УПТК-лий личIи-личIисса къуллугъру бувгьуну ивкIун ур. Зий унува, 1976 шинал заочнайну политехнический институтрал строительный факультет къуртал бувну бур.
КIивагу цалва оьрчI Шахвалил ххуйну дуккин бувну, цал ларайсса кIулшивуртту ласун бувну, гихунмайгу дуклансса чара буллуссар. КIиягу аьлимтал хьуну, хIакьинусса кьини халкьуннан за лахьхьин бай­сса даражалий зий буссар. Вай махъсса шиннардий Шахвали «Водоканалданий» котельный операторну зий уссия.
Шахвали цала ЧукIнавгу, Ккурк­ливгу хъинну бусравсса инсан ур. Ва ЧукIуннал лайкьсса арсъя. КIулссия Шахвалин ккашилнал лякьагу, мякьнал кьакьаригу, буру­ккинттаравун агьнал дакIнил къювугу. ТIитIайва ганал гьарманачIан дусшиврул ка. Дайва хъунив хьуминнан арсшиву, хъуниминнан уссу­шиву, жагьилминнан ппушиву, мюрщиминнан ттатташиву.
Цала ЧукIнав тIурча Шахвалил аякьа, къайгъу асар къавхьусса цучIаввагу акъая. Цумур чIумал цу уххарчагу ШахваличIан ЧукIнавгу, Гьанжилийгу дия дирзунна урцIи, бувцIунма кьуру. Къатлул ахIвал буручлай бия мунащал мунал оьрмулул дус Рабият.
Лавгунни Шахвали ахиратравун оьрмулул къаувччуна, зузаврих мякь къаливхна. Ва хъуннасса оьшиву духIан къахъанай, цайнва цивппа бучIан къахъанай бур мунал ссу ПатIима, кулпат Рабият, душ Жамила, оьрчI Марат. Шахвалил бивкIу къабювхсса, къа­ччан къабивкIсса ца инсан акъар ЧукIуннал, Ккурккуллал шяраваллаву, шагьрулий.
Лайкьну тIайла увккунни Шахвали махъва-махъсса ххуллийн.
Шахвали аьпалул шаврил кьурчIишиву кIидачIлай, жижара буллай буру кулпатрахь, оьрчIахь, махъсса гъан-маччанахь. Цал рухI бигьаний дишиннав, гьав нурданул дуцIиннав, алжан нясив баннав.
Вил хъирив аьтIисса гъан-маччами, чIахху-чIарахми, даврил уртакьтал .
ЧукIуннал ва Ккурккуллал жямат.