ДР-лийсса Роспотребнадзорданул управлениялул контрольданул ва надзорданул даву дуллай бивкIссар накIлия дурсса продукт­ру къалпсса душиврул ягу дакъашиврул хIакъираву.

ХI. Аьдилов
2015 шинал ххал бувссар накIлил продукциялул 349 проба, миннува нормативсса тIалавшиннацIун къабакьлакьисса лявкъуну бур 9%, мунил буслай бур продуктру къалпсса диркIшиву. Микробиологический ккаккиярттан хасну личIину ххал бувну бур 504 проба, миннувату 32% нормативссаннуцIун къабавкьусса лявкъуну бур.
Яла чIявуну физико-хи­мический ккаккиярттацIун къабакьлакьисса лявкъуну бур укунсса журалул накIлил продукциялул пробарду: масло сливочное «Крестьянское», масло сливочное «Вологодская сказка» — 72,5%, спред растительно-жировой «Рама ВИТАЛИТИ», масло сливочное «Милково» — 72,5%, масло сладкосливочное «Вологодское» -82,5%, масло сливочное крестьянское «Экономик» — 82,5%, творог «Сладушка» — 18%, масло сливочное крестьянское «Долина», масло сладкосливочное несоленое «Южанка» — 72,5% ва цаймигу.
Ашкара дурсса къалпсса накIлия дурсса продукция дурну дур АьФ-лул укунсса субъектирдай: Воронежуллал область, Кабардин-Балкьарнал Респуб­лика, Белгородуллал область, ш. Санкт-Петербург, Удмуртуллал Республика, ш. Москав, Ставрополлал край, Къарачай-Чаргаснал Республика.
Гьарца дахлай диркIсса къалпсса продукциялул хIакъираву ДР-лул Роспотребнадзорданул управлениялул хасъсса чагъарду чивчуну тIайла бувкссар лавай кIицI бувсса субъектирдайн, цукунсса диялдакъашивуртту дуссарив ккаккангу бувну. Ми циняв къалпсса продукция ду­ккан дурсса ва Дагъусттаннай дахлай бивкIсса предприятияр­тту административ жаваблувшивурттайн кIункIу бувссар, аьмну цинявннай 913 азарда къуруш аькIралгу дирхьуну.
Базаллуву накI ва накIлия дурсса продукция ххал дурну, ляркъусса диялдакъашивурттал хIакъираву чивчуссар 12 протокол ва дирхьуссар 145000 къурушрансса аькIри.
2015 шинал контрольданул надзорданул мероприятияр­тту даврил хIасиллайну зерхху­ссар дахлай бивкIсса 453,6 кило къалп­сса накIлил продукциялул.