Мартрал 5-нний ДР-лул Культуралул министерствалучIасса Дагъусттаннал халкьуннал творчествалул къатлуву хьунни республикалул районнайсса ва шагьрурдайсса халкьуннал театрдал режиссертурал семинар. Мукун, ва семинарданувух гьуртту хьунни Бабаюртуллал, Бущихъиял, Къаяккантуллал, Ккуллал, Лаващиял, ЦIуссалакрал, Хасавюртуллал, Хъунзахъиял, ЧIарадиял ва цаймигу районнал, Каспийск, Къизлар, Избербаш шагьрурдайсса халкьуннал театрдал режиссертал. Ва кьини ми хьунабавкьунни цIанихсса театровед, Аьрасатнал Федерациялул искусствалул лайкь хьусса ишккакку Гулизар Султановащал.

Ва хьунабакьаву хьунни щаллагу дунияллий кIицI лагайсса Театрдал кьинилул ва республикалий дуллай аьдатравун дагьсса, Избербаш шагьрулий мартрал 23-нний хьунтIисса, халкьуннал театрдал «Маска» республикалул фестивальданул хьунийн.
ДР-лул культуралул министрнал хъиривчу, Республикалул халкьуннал творчествалул къатлул директор Марита МухIадовал дайдирхьунни ва хьунабакьаву. Ванил гьаз бунни халкьуннал театрдал лащинсса материал-техникалул базалийн, къатрайн, репертуарданийн ва цамунийн багьайсса цIурувкьюсса масъалартту. Мяйжаннугу, сайки цинявппагу халкьуннал театрдал цIуцIи кIану бур драматургиялул мюрщими журарду, куцру бакъашиву, яни актертурал хъун бакъасса труппалуцIун ва шяраваллаву­сса культуралул идарарттавусса шартIирдацIун бакьинсса пьесарду биял къахъанахъаву.
Республикалул халкьуннал театрдал режиссертал, миннавух Хъусращиял халкьуннал театрданулма режиссер АхIмад ХIусайнаевгу, буслай бия цалла даврия, хьхьичI бавцIусса масъаларттая ва ми щаллу бувансса чаранная.
Халкьуннал театрду хъанай бур уттизаманнул халкьуннал творчествалул ца яла машгьурмур журану. Мунияту халкьуннал театрдал хIакьинусса тагьар ххал дигьаву, миннул давриву хьунабакьлакьисса масъалартту щаллу баву ва ми театрду хьхьичIунмай бачин баву хъанай дур ца агьамсса давуну.
Театрданул давриву ца агьаммур кIану бугьлай бур репертуарданул. Семинарданий яла-ялагу гьаз буллай бия цIанасса заманалул цIуцIи кIанттаясса пьесарду чичинсса дагъусттаннал автортал бакъашиврул ма­съала. ХIатта цаппарасса районнай, миннувух Ккуллал, Лаващиял, Бущихъиял районнайгу, халкьуннал театрдал цалва сценаристал бунугу.
— Театр хъанахъиссар оьрму чIалачIи буллалисса дагьанину. ТеатрдацIун дакьайсса драматургия ххал дуллай, чIуручIаву анжагъ районнал библиотекарттал литературалий дуллалаву дакъассагу, аьркинссар кка­ккан дуллан халкьуннал аьдатру, культура, сахIналия чара бакъа буслан аьркинссар ляличIисса миллатрал янна-калия, канил касмурдая. Ва шин Зунттал шинну баян бавугу хъанахъи­ссар Дагъусттаннал халкьуннал культуралия бусансса ххаллил­сса хIалуну. Му бакъассагу, чара бакъа аьркинссар цайми муниципал сакиншиннардил театр­дащал даврил кIулшивуртту кIидачIлан, кунначIан кув спектакллащал занан, театр ххираминнал сахIналуцIун цIанихсса драматургтурал, классиктурал пьесарду бакьлакьи буллан, — увкунни Марита Велихановнал.
Ва хьунабакьаврий хIукму бунни театрду кунничIан кув занан гастроллай: Бущихъиялсса, Хъунзахъуллалсса ва ЧIарадиялсса; Ккуллалсса ва ЦIуссалакралсса; Хасавюртуллалсса ва Бабаюртуллалсса.
Гулизар Султановал дакIнийн бивчунни М. Горькийл махъру, театрданул сахIналий ккаккан буллан аьркинссар бусса ку­ццуйсса оьрму бакъача, бикIан аьркинсса куццуйсса тIисса. Мунияту халкьуннал театрдал аьркинссар тамашачитураву ххуйшиву тарбия дуллан, сахIналий багьу-бизулул натурализм кка­ккан къадуллай. Мукунма Гулизар АхIмадовнал маслихIат бунни режиссертурахь постановкардавух оьрчIру ва чIава жагьилталгу хIала буллан.
Хьунабакьаврий мукунма маслихIат бунни халкьуннал театрданул давурттая шайссаксса чIявусса чичлан, кказит-журналлай бакъасса, социал сетирдавугу.