АЬЛИБАГЛУЛ ДУШ АХIМАДОВА АСВАТ
Февраль зурул 15-нний, оьрмулул 85 шинаву аьпалухьхьун лавгунни ххаллилсса хъамитайпа, Хъун дяъвилул ва захIматрал ветеран, Гъумучатусса АхIмадова Асват Аьлибаглул душ.
Буттал КIанттул цIанийсса Хъунмасса дяъвилул шиннардий Асват бивкIссар ватандалийн дурксса захIматсса кьинирду лахълай, цуппа кунмасса душваращал, хъуни хъаннищал буххаву дакъа зий, аьрайн посылкарду щаллу дуллай, тIайла дуклай.
Укунсса душру-хъами дяъвилул шиннардий, цивппа ккаши-мякьну бивкIун, фронтран кумаг буллай, цивппа къаларххун бивкIун, фронтрай талатиминнан жуларду, катIри щашлай, тIайла дуклай бивкIссар. Муниятур вайннан паччахIлугъралгу дяъвилул ветерантурал цIарду дуллусса. Укунсса хъаннил кьимат жучIава муданмагу лавайну буссар. Асватгу ккалли хъанай бивкIссар яла хIарачат бумур душнин.
Оьрмулул ацIния мяйра шинава шинмай Асват зий бивкIун бур почтрал связрай, Лакрал райпорал ттучаннай. Ванил захIматрал стажгу 50 шиная ливчусса хъанай бур. Асват лайкь хьуну бур «Ветеран Великой Отечественной войны» ва «Ветеран труда» медаллан. Оьрмулуву пахру-ххара бакъасса, цила ума ххирасса, лагма-ялттунащал хIал бавкьусса инсан бия ва.
Асват дунияллия лагаврил кьурчIишиву кIидачIлай, жижара буллай буру ванил уссил душнихь Луизахь, уссил арсурваврахь Мажидлухь, Исяхь, Аьлибаглухь, АхIмадлухь ва цинявппагу гъан-маччаминнахь. Цил бунагьирттал аьпа баннав, алжан нясив баннав, махънал оьрмурдай барачат бишиннав, аммин.
Лакрал райондалул
Ветерантурал комитетрал ва Гъумучиял жяматрал чулуха
——————————-
ШАМИЛЛУЛ ДУШ СУКАЕВА ЗИНАИДА
Оьрмулул 85 шинаву ахиратрахьхьун лавгунни Гъумучиял шяраватусса Шамиллул душ Сукаева Зинаида.
Зинаида бувну бур 1930 шинал Хасав шагьрулий. Микку школа бувккуну махъ бувххун бур Дагъусттаннал паччахIлугърал медициналул институтравун. Институт къуртал бувну мукьах тIайла бувккун бур зун Гъумукун хIакин-офтальмологну. Муния махъ мува пишалий зий бивкIун бур Сахалиннай. Дагъусттаннайн зана хьуну мукьах зий бивкIун бур участокрал хIакин-терапевтну.
Цилва оьрмулул кьадар ванил кIибавчIуну бур АькIиев МахIаммадлущал, цалгу ларсун диркIсса медициналул къуллугърайсса полковникнал цIа, цачIу хъунигу бувну бур лайкьсса кIия арс.
Зинаида аьпалухьхьун лагаврил жижара буллай буру арсурваврахь Шамиллухь ва Кьасиннухь, махъсса щалвагу агьлу-авладрахь. Цин алжан нясив баннав, гьав нурданул дуцIиннав.
Хасав шагьрулийсса
цинявппагу лак, дустал, гьалмахтал
——————————-
САДИКЬЛУЛ АРС ГЪАЗАЕВ ШИРВАНИ
Февральданул 22-ний ахиратравун лавгунни Ххутиятусса Гъазаев Ширвани Садикьлул арс.
Ширвани увссар 1937 шинал Ххутрал шяраву. Буттал КIанттул цIанийсса Хъунмасса дяъвилий ппу бат хьуну, нину Пирдавс лирчIссар кIия арснащал ва душнищал. ОьрчIал биялсса хIарачат бувссар ниттин цащава шайсса кумаг бан. Мукун чIивинийва захIмат ккавкссар ва мунил кьадру кIул хьуссар Ширванинан. Колхозрай зий яла хьхьичIунминнавух уссия.
Школа къуртал бувну махъ, совет аьралуннаву танкистну, спортраву хьхьичIунну ивкIссар. Мунияр махъ зий уссия Багьу-бизулул объединениелий: фотосуратру ришлай, музыка чичлай. Га ккаллину уссия МахIачкъалаллал шагьрулий яла хьхьичIунма суратрищун. 1975-1984 шиннардий МахIачкъалаллал шагьрулул Советский исполкомрал депутатну ивкIссар.
Амма цала тачIав гьашиву къадайва цанма кIулмуний. Ширванинал кIунттища дукъаккайсса даву къадикIайва. Ванан кIула чарил даву, муххал ва тIаннул усттаршивуртту, къалайчишиву – цинявппа ичIува аьркин шайсса пишарду.
Тамашану тIааьнсса чIу бикIайва Ширванинал. Ванал кунмасса бюххансса чIу бусса балайчитал къагьарзасса бур лакрал. Ванал балай бяличIан бувна арс Садикьгу, арснал чIивисса душгу автоапатIраву ливтIуну мукьах.
Хъинну кумаг бан, инсаннал чIарав ацIан ччисса хасият дия Ширванинал. 1964 шиная шинай кIиягу уссу Гъазагу, Ширванигу МахIачкъалалий цачIу, ца азвардануву ялапар хъанай бикIайссия. Дунияллий бакъахьунссия вай кунма цаннащал ца бавкьусса уссурвал. Гьарца ялун увкIманан хIисав шайва кIиягу уссил магьраву кIицI дан бучIисса ччаву. Ширвани цукун бусравсса инсан ивкIссарив чIалачIи бунни ва махъва-махъсса ххуллийх тIайла уккан бувкIсса агьалинал чIявушиврул. Ширвани кьянкьану диндалул ххуллу бувгьусса инсангу ия.
Аьпа баннав ххаллилсса чувнал, ванан къабуллумур оьрчIан, кулпатран, уссурссуннан булуннав!
Ширвани аьпалухьхьун лагаврил къумашивугу кIидачIлай, дакIнийхтунусса жижара буллай буру ванал уссурссуннахь, щалагу агьлу-авладрахь.
Ххутрал жямат,
дустал, гьалмахтал
———————————————
ОЬМАРДУЛ АРС ОЬМАРОВ ХIУСАЙН
Оьрмулул 82 шинаву аьпалухьхьун лавгунни Хъюллал шяраватусса Оьмардул арс Оьмаров ХIусайн.
ХIусайн увну ур 1934 шинал Ахъушиял райондалийсса Хъюллал шяраву хъудугьул кулпатраву. Школа бувккуну махъ дуклай ивкIун ур Буйнакскаллал зунттал агьалинал интернатрай. Муния махъ къуртал бувну бур Дагъусттаннал паччахIлугърал университетрал дазул кьатIаллил мазрал факультет. Институт бувккуну мукьах зий ивкIун ур Лаващиял райондалийсса Къара-Къадиннал мяйра шинал школалул директорну. 1962 шиная 1990 шинайн ияннин зий ивкIун ур КГБ-лул къуллугърай. Пенсиялийн увккун махъ зий ивкIун ур агропромбанкрал даврий.
Лайкьну буллай ивкIсса захIматрахлу ХIусайннул хIалал дурну дур медаллу ва хIурматрал грамотартту.
Ссаха зий, чув зий ивкIун ухьурчагу, ХIусайннул хIалал бувну бур анжагъ хIурмат.
ХIусайн аьпалухьхьун лагаврил пашманшивугу кIидачIлай, дакIнийхтунусса жижара буллай буру ванал кулпатрахь, арснахь ва душваврахь ва махъсса цинявппагу гъан-маччаминнахь.
Цал бунагьирттал аьпа баннав, алжаннул ххари аннав.
Хъюллал, Бархъаллал, ЦIуликъяннал ва ЦIахъардал жямат
———————————————
МАХIМУДЛУЛ ДУШ МАРИЯН
Хъунмасса хIаллай къашавайгу бивкIун, оьрмулул 93 шинаву аьпалухьхьун лавгунни ххаллилсса хъамитайпа, яхI-къириятрал ва аькьлу-кIулшилул бувччусса зунттал душ, щарнил жяматраву, цищала зузиминначIа ва цуппа кIулминначIа сийлий оьрму бувтсса, дакI-аьмал хIалимсса, къатлулгу, кулпатралгу, оьрчIалгу, оьрчIал-оьрчIалгу дакI ххари дуллай бивкIсса шавхьсса хъамитайпа МахIмудлул ва Аьйшатлул душ Мариян.
Мариян бувссар 1923 шинал Инишиял шяраву хъудугьул кулпатраву. ЧIивину бунува, колхозру дуваннин, шаппаминнан кумаг буллай зий аьдатсса Мариян, колхозравугу дяъвилул шиннардий циняв зун бюхъайсса арамтал дяъвилийн лавгун, миннал дайсса чIиникIрах цулуцавугу, хъурссух гъайчавугу дуллай, цищалва шаймур бувссар тай захIматсса шиннардий. Бюхъайсса кумаг буллай бивкIссар цила шаппаминнан, колхозран ва шяраваллил халкьуннан. Шяравусса школагу къуртал бувну, советрал секретарьну, колхозрал учетчикну, бухгалтерну, бригадирну, складрал заведующийну зий, Инишиял колхоз ва жямат ччаннай бацIан буллай хъунмасса захIмат бувссар Марияннул. Дяъвилул шиннардий учительтал биял къахъанай, 7 класс къуртал бувну учительну зун увкIсса Аьлиллущал ташу бувну, Марияннул ва Аьлиллул циняв мяш хьунсса кулпат бувссар.
Цила ласнащал Марияннул шама оьрчI ва шанма душ хъуни бувну, дуккин бувну, кулпатирттал щаллу бувссар, оьрчIал оьрчIру хъуни буван Марияннул бувсса захIматгу, аякьагу жул жяматран, ванил оьрчIан, куявтуран, оьрчIал оьрчIан тачIав хъамакъаритантIиссар. Марияннун цила куявталгу цила оьрчIая личIи къабувну, арсурваврал хъамигу цила душварая личIи къабувну ххирая.
Марияннул чаннасса аьпа абадлий личIантIиссар жул дакIурдиву, цил бунагьирттал аьпа баннав, цил хьхьичI алжаннул къапу тIитIиннав, рухI алжаннул ххари даннав, гьав нурданул дуцIиннав.
Марияннул кьурчIисса бивкIулул къумашивугу кIидачIлай, жижара буллай буру ванил арсурваврахь Адамлухь, Маликлухь, Илдардухь, душваврахь Мисидухь, Аминатлухь, Рукьижатлухь, арснал хъаннихь, куявтурахь, миннал оьрчIахь, махъсса цинявппагу гъан-маччанахь.
Инишиял ва Ккуцрал жямат
———————————-
АцIния мяйра шинаву аьпалухьхьун лавгсса Бархъалатусса ПатIиматлул аьпалун
Сил диртун ччурччусса банавша-тIутIий,
Ялугьлай биявав вих хIурулъэнтал?
Дунъяллий вин кIану бухлавгунавав,
ХIатталлий ца чару чанну биявав?
Оь-накI хIала симан, яшмилул яру,
Янувну пар тIисса марцI-кIяла симан
Цал ххал хьуна ттун вил къакъунттул бущи,
КIилчин ххал хьу чIумал микIлачIун бувнав.
Дард дакъая, ххирай, вил кьадарданул,
Вин ччай ивкIсса оьрчIал цIа-бакI кIулния.
ДухIлай-духIавияв, ххирай, вил хIасрат,
ЧIа кусса мурадрал мина кIулния.
Вил ниттил ларх лухIи ляличIи дизай,
Инагу най чIалай ниттищал архIал.
Вил буттал бивкIугу бахттину бизай,
КкухIлай къаличIансса вилмунил кьартIа.
Ххирай, тти ххари ба ми хIурулъэнтал,
Биян ба къабивми тти мурадирайн.
Вай махъру вихава увкусса нагу
Мубараксса ххуллий багъишла бити.
Хамис Ссупиянова,
ш. Бархъал
