Ватан дуруччултрал кьинилул хьунийн, «Дом Дружбы» ГБУ-лул къатраву хьунни Хъун дяъвилул ветерантурансса, авгъаннал ва цаймигу локальный дяъвирдаву гьуртту хьуминнансса хъун дакъасса байран. Шадлугъ хIадур дурну дия «Дом Дружбы» ГБУ-лул, «Открытые сердца» волонтертурал клубращал цачIуну.
З. Тахакьаева
Муний гьуртту хьунни отставкалийсса генерал-майор Оьмар Муртузалиев ва цаймигу дяъвилул ветерантал, МахIачкъала шагьрулул кадетский корпусрал ва школарттал дуклаки оьрчIру.
Ветерантал барча буллай, шадлугъ тIиртIуна «Дом Дружбы» ГБУ-лул директор Георгий Гьаруновлул.
Отставкалийсса генерал-майор, ТОКС-рал командир, «Аьпалул луттирал» редактор Оьмар Муртузалиевлул бувсуна цалла каялувшиннаралу итабакьлакьисса луттирая, ТОКС-рал даврия. КIицI лавгуна ТОКС-рал кьюкьраву дяъвилия зана къавхьуминнах луглай бивкIсса оьрчIава цуя-ца экстремистурал кьюкьравух хIала къаувхшиву, миннал чул бувгьуминнащал архIал къабивзшиву.
Авгъаннал иширттаву гьуртту хьусса МахIаммад Хадулаевлул кIицI лавгуна КIилчинмур дунияллул дяъви къуртал хьуния шихунмайгу дунияллий дяъвилул чIу лагь къавхьушиву. Ва цувагу гьуртту хьуну ур шанма дяъвилул иширттаву: Авгъаннаву, 1999 шинал Дагъусттаннайн къачагътурал кьюкьри ххярхсса чIумал ва 2008 шинал Кьиблалул АьсатIиннавусса дяъвилул иширттаву.
Волонтертурал, кадетътурал ва дуклаки оьрчIал ветерантуран ккаккан дуруна концерт.
Ахирданий Хъун дяъвилул ветеран ХIусайнаев Саэдлулгу увкуна лакку мазрайсса балай.
«Дом Дружбы» ГБУ-лул ветерантуран тIивтIуна нацIу-кьацIулущалсса ссупра.
