Дагъусттаннал региондалийсса «Единая Россия» партиялул председатель Дмитрий Медведевлул приемныйлуву март зурул 9-нний агьали кьамул бунни ДР-лул Халкьуннал Мажлисрал депутат Зайнуллагь Мирзоевлул.

И. Саидова
Ва кьинисса агьалинал масъалартту бия даврил щаллу баврил, коммунал хIаллихшиннардил, къатта-къушлил, аьрщи итадакьаврил хIакъиравусса.
МахIачкъалалив ялапар хъанахъисса Балакеримов Фердоуси увкIунни коммунал хIа­ллихшиннардан итабакьай­сса субсидияртту булун кумаг бара тIий миннатрай. Ва инсан ур чIярусса шиннардий захIмат буллай ивкIсса, цIана пенсиялийн увксса. Ванал пенсия бур 9 азарда къуруш. Ванан багьлай бур 2900 къуруш субсидиялун. БалакеримовлучIа субсидияртту булун багьайсса цинявппа документругу низамрай бур, амма ва авара хьуну ур цанна дагьайсса субсидиярттал арцу къадуллай. Зайнуллагь Мирзоевлул ва ма­съалалул хъирив лаяву тIалав бунни Кировский райондалий­сса субсидияртту итабакьайсса отделданийн оьвкуну.
Лабазанов ХIасан увкIун ия аьралуннаву къуллугъ буллай къашай хьусса цала арснан багьайсса компенсация булун кумаг баву тIалав буллай. ЦIана ванал арс, ччаруллал къашавай уну, ччя-ччяни ми марцI бу­ккан байсса процедурарду буллан занай ур азарханалийн. Ва ур къуману къашавайсса инсаннан кумаг бан ччисса цучIав акъар тIий. Зайнуллагь Мирзоевлул Лабазановлул арснан аьралуннаву цIунцIия хьушиву тасттикь буллалисса ча­гъар тIалав буллалисса аьрза гьан бунни республикалул военкоматрайн. Минная жаваб дучIайхту, махъ буллунни ва масъалалул хIакъиравуАьФ-лул обороналул министр Сергей ШойгучIан чагъар чичин.
Кирчуев ЦIаххай ва МахIам­мадова Сабрина бувкIунни Новостройрай аьрщи дулаврил масъалалул ялув. Вай масъалартту дузал баву цала бакIрайн лавсун, Зайнуллагь Мирзоевлул маслихIат ккавккунни ЦIу­ссалакрал райондалул администрациялул бакIчинайгу бивхьуну, мунащал архIал щаллу бан.
МахIачкъалалив ялапар хъанахъисса Саралиев Малик ва ХIусайнов Ризван бувкIунни давурттал щаллу бан кумаг бара тIий. Саралиев Малик ур шагьрулул ца зумания Ленинккантливсса школалийн дарс дишин занай 40 шин дав тIий. Даву, архну душиврийн бувну, кьаритан багьунни тIий. Вай давурттал щаллу баву мурадрай Зайнуллагь Мирзоевлул цаппара министерстварттайн чагъарду тIайла бувккунни.
Зайнуллагь МирзоевлучIан увкIунни мукуна медициналул чулухасса квотарду ласун кумаг бара тIисса шама инсан. Миннал мурад щаллу баву мурадрай, ванал гава цIана оьвкунни ЦIуллу-сагъшиву дуруччаврил министр­найн.
ЦачIанма бувкIсса циняв­ппагу агьалинал мурадру би­ттур баврил ялув ацIаву цала бакIрайн лавсунни ДР-лул Халкьуннал Мажлисрал депутат Зай­нуллагь Мирзоевлул.