Ва бигьа бакъасса службалуву къуллугъ буллалисса хъами байрандалущал барча бан бувкIун бия Дагъусттаннал Виваллил иширттал министр, полициялул генерал-лейтенант Аьвдурашид МахIаммадов, подразделениярттал каялувчитал ва зузалт.
А. Аьбдуллаева
Чаннасса интнил байрандалущал хъами барча буллай, ихтилат бунни Аьвдурашид МахIаммадовлул.
— Ттун тIааьнну бур интнил цалчинсса байран жула ххирасса хъаннин-ниттихъан, ссурвавран, кулпатирттан хас дурсса душиву. Виваллил иширттал министерствалуву, личIи-личIисса подразделениярттаву зий буссар 1500-ннийн бивсса хъами. Ми цинявппа лажин кIялану биттур буллай бур цалва къуллугърал бурж. МВД-лул личIи-личIисса структурардаву зий, мудангу мукIру шара хъаннил цалла даву дагьайкун, дакI дирхьуну, дирчIан дурну дуллай бушиврий. Гьарица чIумалгу, билаятрайгу, республикалийгу дакьаву дуруччаву, паракьатшиву дузал даву мурадрай, хъаннил хъуннасса хъар лархъун най буссар, — увкунни министрнал.
Ванал мукунма барчаллагь увкунни, чIярусса шиннардий виваллил иширттал органнаву зий, хъунмасса захIмат бивхьусса службалул ветерантурахь.
— Цуксса лавайсса къуллугърай, жаваблувсса даврий зий бухьурчагу, гьарицагу хъамитайпалул оьрмулуву агьаммур кулпатри, оьрчIрур. На чIа тIий ура зунгу, зул оьрчIангу цIуллушиву, кулпатирттаву нахIу-хIалимшиву. Буруччияра зулва кулпатру, зулва кюру, — увкунни Аьвдурашид МахIаммадовлул.
Хъирив министрнал бахшишру дунни давриву хьхьичIунсса ккаккияртту чIалачIи дурсса хъаннин ва службалул ветерантуран.
Хъаннин хас бувсса шадлугърал мажлис бачин бувну ия Поэзиялул театрданул хъунаманал хъиривчу Супиян Оьмаров.
Виваллил иширттал органнаву зузисса хъами байрандалущал барча бан бувкIун бия дунияллийх цIа дурксса «Лезгинка» ансамбль, Дагъусттаннал лайкь хьусса артистал. Вайннал ккаккан дунни ххаллилсса концерт.
