Экипийсса поэзия хIасул хьуссар инсантал тухумирттай ялапар хъанахъисса чIумалва, патриархально-родовой строй диркIсса заманнай. Эпос хIасул хьуссар, халкьуннал агьамми иширттан хас буллай. Эпос бикIайссар назмулийсса ва насрулий­сса (прозалийсса). Лахъи балайрдайн учайссар эпос куну, магьрайнгу учайссар магьрал эпос куну.

ХьхьичIва-хьхьичI ПартIу ПатIимая чивчуну бур Саэд Габиевлул 1906 шинал бувксса «Лак, гайннал лавгмур ва багьу-бизу» тIисса оьрус мазрайсса очеркраву. С. Габиев чичлай ур: «Лакрал бур Жанна Д*Арклуха лащан бан лайкьсса душ, цилгу ца заманнай буттал улча мангъулная ххассал бувсса. Ганил виричушиврул барашиннану бур ганил гьаттай бацIан бувсса чару. Гъинттул чIумал гиккун зияратрай чIявусса агьали бучIай, хаснува хъами: га ккалли бай мубараксса душнин» (оьрус мазрая).
С. Габиев буслай акъар цумур чIумал бувкIсса мангъулнащал талай бивкIссарив ПартIу ПатIима. Аьли Къаяев чичлай ур, га 1240 шинал Лаккуйн бувкIун бивкIсса мангъулнащалли талай бивкIсса тIий. Мяйжаннугу, мангъул та шинал бувкIун бур Лаккуйн. Гайннал Ккул-Хъусращигу, Хъусращиял чIаравсса ТIамас тIисса къалагу лавсун, Гъумучигу лекьа-пIякьу бувну бур.
«ПартIу ПатIима» тIисса поэма бур хас бувну 1395-1396 шинал Дагъусттаннайн увкIсса Тамерланнун, ПартIу ПатIима бур ганал аьралуннащал талай. Ганил дяъвирдугу чув хьуссарив жунма къакIулли. Поэмалуву муниясса хаваргу бакъар.
«ПартIу ПатIима» лахъи балайри тIий, га бивщуну бур 1954 шинал «Дусшиву» альманахрай. Гара шинал август зуруй га, Семен Липкиннул таржума бувну, бивщуну бур «Дагестанская правда» тIисса кказитрал 159-мур номерданий. «ПартIу ПатIима» бивщуссар лак­рал поэзиялул антологиярттаву, школалул хрестоматиярттаву, «Лак­рал лахъи балайрду» («Лакские эпические песни») тIисса луттираву (1969). Муния махъ га бувккуссар «ПартIу ПатIима» тIисса жужравугу (1972), цайми изданиярттавугу. Га хьхьичIзаманнуясса бухьувкун, бишлайнигу га бищай хьхьичIва-хьхьичI.
Амма махъсса шиннардий аьлим­тал (Эса Аьбдуллаев, Сулайман АхIмадов, Нурислан Жидалаев) бувкIун бур цамур пикрилийн: «ПартIу ПатIима» лахъи балай (эпос) бакъарча, му XX аьс­рулий чивчусса эпикийсса поэмар, тIисса. Миннал хIуччардугу бур укунсса. Му хьхьичIазаманнул эпосраха лавхьхьусса бакъар. ХьхьичIазаманнайсса балайрдаву къабивкIссар строфарду, маз бикIссар къуркъасса, ттизаманнулмунияр личIийсса, чIявусса букъавчIайсса махъру хIаласса. Та чIумул балайрдаву диркIссар чIярусса хъунбавуртту (гиперболарду), урттуксса ягу ссавнийсса цIурттиксса чIявусса душманнал аьраллу, талатавриву оьттул нехру най, балайлувусса виричунал уттус­риксса кару, бярдуксса яру бур м.ц.
«ПартIу ПатIима» тIурча бур чаннасса, марцIну уттизаманнул мазрай чивчусса, строфардайх бавчIусса, строфарду куннил хъирив кув нанисса, вирттаврал сипатру яргну, чIаланну ккаккан дуллалисса. Поэмалул байбихьулий дурну дур багьу-бизулул сурат: жагьилтал бур хIатталлил чIарав дяъвилул тIуркIурду буллай, душ бур гайннал чIарах щинав най. Жагьилтуран га сангу бакъар. Амма лавгун шаппай, ларххун адаминал лаххайсса дяъвилул яннагу, бавхIуну чаннасса ярагъгу, га цIунилгу бучIай, лухIисса чайгу бурттий, жагьилтурачIан, ккаккан бай гайннан цила гьунар. ПатIимал цува ух увкун, жагьил ур дакI гъаргъун. Каруннил бакIгу бувгьуну, та щяикIай тинмайсса чарий. Душгу бур чIахху оьрчI паракьат уллай. Га бур, «нигьабувсъсса ттуккул барцI бугьайссарча, хархавар ба­къасса даву хьуннича», — тIий.
Шикку ца хавардануву кунма­сса иш хъанай бур. Мукуннасса интонациялий, багьу-бизулул иш кунма ккаккан бувну бур ганил хъиривсса бутIагу. Нину дур ПатIимайн дяъвай, ина адаминал янна циван лаххав, тIий. Цаппара гьантрава АхIмадлул гьан дурну дуркIунни мугьису СалихIат, ганал чагъаргу лавсун, ПатIимах га эшкьи хьуну ушиву бусан. Вай бутIравугу психологизм ялтту дуклай дур. Поэмалул вирттаврал психология дур XX аьсрулул инсантурал психология. «Хъявринсса ччаву» тIисса Курди Закуевлул повестьраву ва «ХIавиват ва ХIажияв» тIисса МухIуттин Чариновлул драмалуву кунма, ва поэмалуву жагьил ур душничIан ча­гъар гьан буллай. Жунна гайннул дянив цичIар личIишиву чIалай дакъар. XIV аьсрулий жучIара чичру къадиркIшиву жунма кIулсса зад бур. Цукунни та заманнул инсантал кунначIан ку чагъарду чичлай бивкIсса? Шикку автор чансса аьвкьуну ур, цала чIумал кунма инсантал та заманнайгу бивкIсса ххай. Ва эпос бивкIссания, гиву чагъардаяту ихтилатвагу къабикIанссия.
Тамерланнущалсса дяъвилий­сса ишру ва ца романтийсса поэмалуву кунма ккаккан бувну бур. Амма гиккугу дакъар гиперболарду. Дур яргсса лащанбавур­тту: «цIарал ххяллу» (аьраллу), «лачинт» (лакралми аьрал), «шярлурт­ру» (мангъул). Вай бутIравугу дур психологизм: лакрал чIири кьюкьа цала аьралуннащал талан най дур, га кьюкьлул бакIчинугу душ бур тIий бавукун, Тимур рихшант­рай пиш тIий ур, цала мюрш яру цIирх бикIан буллай ур. Гьалмагъай ивкIусса ПатIимал тагьар дур хъинну захIматсса, АхIмадлул нурчIи ккарккукун га вав-шав тIий аьтIий бур. «ЛухIисса яруннил кIири макь рутIлай» ур АхIмадлул уссугу. Лак­рал аьралуннал укуннагу чIирисса дастта ялунгу чIири лирчIун дур, «ххялтIа шайсса кунна кьацIливу ккарччив». Вай кIанттурду эпосравунияр, поэмалуву лайкьри.
Му бакъассагу, поэмалуву диндалул кьанкьрагу дакъар, щам­ххалгу гьаз уллай акъар ганиву. КъабувчIлай бур, цанни щамххал къалавгун аьралуннал бакIчину, щинчIав къакIулсса душ бивтун бивкIсса аьралуннал ялув. Му чулуха ва поэма дахьра Совет хIукумат дирхьусса шиннардий чивчусса хханссар.
Аьлимчу, чичу, шаэр, педагог ХIамзат Муркъелинский ивкIун ур Эса Аьбдуллаевлухь, га поэма цала чивчуссия тIий. Му къавиххьунсса затгу бакъар: 1929 шинал къуртал бувсса, «Каинат» тIисса ХIамзат Муркъелинскийл драматический поэмалул ва исват буллай бур шеъриятраву ганал цукун лавайсса пагьму бивкIссарив.
Ва луттирал хьхьичIми изданиярттаву чивчуну буссар Х. Халиловлул рирщусса циняр вариантру («ПартIу ПатIима ва щамххал», «ПатIимал уссу Аьзи», «ПартIу ПатIимал» лахъи дурмур текст) кьамул дуллай. Амма уттива-тти ттун бувчIунни, нава аьйкьлай ивкIшиву. Х. Халиловлул гай «вариантру» цала хIасул дурну дур ПартIу ПатIимал нех хъун дан, ганил сий гьаз дан ччай. Мичча-тичча, цайми халкьуннал балайрдая бутIри лавсун, гай цачIун бувну, «ПартIу ПатIимал» цIусса «вариантру» дурну дур. Ми иширттая жува гьарта-гьарзану чивчуну буссар «Эпическая поэма «Парту Патима»: Проб­лема жанра и автора» (2008, 2009) тIисса жужраву. Га жуж бивщуну буссар ттула «Избранные труды» (2014) тIисса луттиравугу.
ПартIу ПатIима машгьур був­ссар Минкаил Аьлиевлул «ПартIу ПатIима» тIисса пьесалул. Наби Дагировлул чивчуну, МахIачкъалалий ккаккан бувсса «ПартIу ПатIима» тIисса балетрал. Га балетраву ПартIу ПатIима бур ТимурдучIан ясирну багьну ккаккан бувну. Му иш поэмалуву, ягу бусалардаву кIицI лавгунвагу бакъар. ПартIу ПатIимал чувшиву даврил 600 шин барча дуллай, Лаккуй тамансса шадлугъру дурссар, «Илчи» кказитрай таман­сса макьалартту, суратру рирщу­ссар. Цалла макьалардаву Аьхъаратусса МахIаммад ЦIаххаев, ПартIу ПатIимал цIанийсса фондрал председатель, ва цаймигу чичлай бур, га душ цала шяраватуссар бивкIсса тIий, му зат исват буллай (гайннахь цIуххирча, га бувну бивкIун бур Аьхъарав, Ккулув, ЧIурттахь, м.ц. щархъаву). Ганил гьаттай зияратгу бацIан бувссар. Гъумук бюхттулсса гьайкалгу дацIан дурссар. Му иширалгу буслай бур лакран ПартIу ПатIима хъинну бусравну бушиву, ттинин ганил дурмур халкьуннан хъамакъариртшиву.
Халкьуннал тарихравун багьсса лакку душ ПартIу ПатIима хъана­хъиссар жува циняв хIайран буллали­сса гужрал заллу, эбрат ласунсса виричу, га цуми монголнащал талай бивкIнугу. Ганиясса поэмагу гьава­срай чивчуну бур, га щил чичирчагу. Амма га чивчуну бур XX аьсрулий. Ганийн эпос тIунгу къабучIир.
Сулайман АхIмадов, филологиялул элмурдал
доктор, профессор