САЙПУЛМАЛИКЛУЛ АРС МАХIАММАДОВ ОЬМАРИ
ЦIуцIаврил бас увну, оьрмулул 46 шинаву аьпалухьхьун лавгунни цаламинналгу, чилгу дянив бусравшиву ххисса, дакI-аьмал уздансса, гьарцаннащал хIал бавкьусса инсан, хIакьсса захIматчи, Карашрал шяраватусса Сайпулмаликлул арс МахIаммадов Оьмари.

Оьмари увну ур 1969 шинал Карашрал шяраву. Школа къуртал бувну махъ зий ивкIун ур личIи-личIисса давурттай. Ванал хъунмур давуну дикIайва кьай духхайсса хъуни машинарттай рейсирдай заназаву. Махъсса шиннардий, даврицIун ва маэшатрацIун бавхIуну, цала кулпатращал архIал зийгу, яхъанайгу уссия Санкт-Петербурглив. Аьпалу­хьхьунгу тийхва унува лавгунни. Амма, лавсун бувкIун, увччунни Дагъусттаннай.
Жагьилсса оьрмулий Оьма­ри аьпалухьхьун лагаврил пашманшивугу кIидачIлай, дакIнийхтунусса жижара буллай буру ниттихь Ссапижатлухь, кулпатрахь Мадинахь, уссурваврахь МахIаммадлухь ва Катиб­лухь, ссурваврахь Раисатлухь ва ПатIиматлухь ва махъсса цинявппагу гъан-маччаминнахь.
Цал бунагьирттал аьпа баннав, рухI рахIатний дишиннав. Махънал оьрмурдай барачат бишиннав.
Карашрал жямат, дустал, гьалмахтал

—————————

ОЬМАРДУЛ АРС СУЛТАНМАХIАММАД КЪАЛМАЕВ
Вай гьантрай, оьрмулул 54 шинаву, ахиратрал хьунни уздансса агьлу-авладрал арс Къалмаев СултанмахIаммад.
СултанмахIаммад увну ур 1962 шинал 1-мур ЦIувкIуллал шяраву. Школагу хьхьичIунну къуртал бувну, дуклан увххун ур Дагъусттаннал Медициналул институтравун. Мугу къуртал бувну, ванал язи бувгьуну бур хъунама хIакин-терапевтнал пиша. Зий ивкIун ур Дагъусттаннал туберкулезрал больницалий хIакинну. СултанмахIаммад ия цалла даву ххуйну кIулсса, бюхъу-бажар бусса пишакар.
Махъсса шиннардий уссия ишбажаранчишиву дуллай.
Ва ия цумацаннащалгу хIал бавкьусса, аьчухсса, халкьуннал хIурмат-кьимат бан кIулсса, ас-намус лавайсса инсан.
СултанмахIаммадлул бив­кIулул кьурчIишиву кIидачIлай, жижара буллай буру ванал кулпат Земфирахь, арснахь, душнихь ва цинявппагу гъан-маччаминнахь.
Цув алжаннул ххари аннав, рухI хъинний дишиннав, махъминнал оьрмурдай барачат бишиннав.
1-мур ЦIувкIуллал жямат

—————————

АЬЛИМИРЗАЛ АРС ДАВЫДОВ МАХIАММАД-РАШИД

Уттигъанну, хархавар бакъа, оьрмулул 67 шинаву, жуятува личIи хьунни ххаллилсса лаккучу, щала лакрал жяматран бусравсса, акъа чара бакъасса, хасиятраву авкьусса, идавс кунасса диндалул инсан, ЧIурттащатусса Аьлимирзал арс Давыдов Ма­хIаммад-Рашид.
Увну ур МахIаммад-Рашид 1948 шинал сентябрь зурул 21-нний ЦIуссачIурттащиял шяраву Аьлимирзал ва Салиматлул кулпатраву. МахIачкъалалив механикалул техникумгу къуртал бувну, увххун ур Харьковуллал авиациялул институтравун. Шамилчинмур курсираву гагу кьабивтун, зун увххун ур «Дагдизель» заводрал 21-мур цехравун, яла Щурагьун ивзун, агрегат­ру бай заводраву токарьнал пишалий зун ивкIун ур. 1973 шинал апатI хьуну, бакIрайн щаву дирну, инвалидностьгу ларсун, даву кьадитан багьну бур.
МахIаммад-Рашид жагьилну унува диндалухун агьну уссия. Ванал нину-ппугу хъинну дин-чак дусса буссия. Цува чIивиний нитти-буттал ла­хьхьин бувмур къагьану, бусса оьрмулий цащала цува аьраб маз лахьлай икIайссия. Дин-чак ла­хьхьин дурна цалва оьрчIангу, гъан-маччанангу, дан ччинан цинявн­нангу. (Ванал кIилчинма арснал Нариманнул къуртал бувссар Кембриджский университет, зий ур Москавлий).
МахIаммад-Рашид уссия мяйжаннугусса диндалул инсан (2-3 ссятрайсса шанугу лавхъун, кIюрххицIун чаклил чIун хьуннин буллай чакру, зикри бихьлай, кьуран ккалай, уссур-ссуннахьгу, явара чак макьабитару тIий икIайва). МахIаммад-Рашидлун ккашилнал лякьагу, мякьнал кьакьаригу кIулссия, ссахIлил арцурду ппухъру ба­къаминнан дулай­ссия. Бусса оьр­мулий цащава шайсса ка-кумаг байссия, чIарав ацIайссия ахIвал кIюламиннал, сакъатминнал, кумаг аьркиннал. Учингу кIулссия, бусангу кIулссия (хъинну грамотнайссагу ия), маслихIатчигуя, цачIана увкIманахгу хъинну ургъил бай­ссия.
Жуятува лавгунни хъиншиврул бутIа ххишалану буллу­сса, яхI- къириятрал увччусса дугърисса инсан. Щала жямат кьабивтунни хъару кьуркьуну. БивкIурдугу лахъан, мавлудругу дуккин ва акъа чара бакъа­сса инсанъя.
Цибанссар, бивкIулун чаран бакъассар учай. Ва кьурчIисса бивкIулул жижара буллай буру кулпатрахь, арсурваврахь, душнихь, арсурваврал хъаннихь, уссурссуннахь, гъан-маччанахь, щалагу агьлу-авладрахь. Цал гьав нурданул дуцIиннав. Алжаннул къапурду тIивтIуну лякъиннав, махънал оьрмурдай барачат бишиннав. Амин!
ЧIурттащиял жямат

———————

ДакIнийхтуну кьурчIишиву кIидачIлай, жижара буллай буру Розал арсурваврахь, уссурссуннахь, гъан-маччанахь цинявннахьвагу,
Юсуплул душ Шовкринская Роза
аьпалухьхьун лагаврийн бувну. Цил гьав нурданул дуцIиннав, Алжаннул ххари баннав. Махънал оьрмурдай барачат бишиннав.
ШавкIуллал жяматрал цIания Айгунов МахIаммад