Ларгсса алхIат кьини, февральданул 7-нний, Аьрасатнаву дунни Спортрал кIинтнил журардал кьини ва 2014 шинал Сочилий хьусса билаятрал тарихраву цалчинми Олимпиадалул тIуркIурду хьуну махъ ца шин шаврил годовщина.
Спортрал сообществалул тарихраву яла хьхьичIунминнувасса цавайннун ккалли бувсса 2014 шинал ТIуркIурду байбивхьуссия дурусну кIира шинал хьхьичI – февральданул 7-нний. Аьрасатнал Олимпий комитетрал 2015 шинал ва кьини цалчин дурссар Спортрал кIинтнил журардал кьини (День зимних видов спорта). Ва хъанахъиссар физкультуралул, спортрал ва цIуллуну оьрму бутаврил билаятрал аьмсса байран, ванил лагма лаган бувссар ттуршазарахъул инсантал. Гьашину байрандалун цIа дирзун дур «От Сочи к Рио», ва хас дурну дур Аьрасатнал олимпий цачIундур команда РИО-де Жанейролий хьунтIисса Гъинтнил тIуркIурдан.
Шадлугъирттал хъунмур кIану бия 2014 шинал кIинтнил Олимпиадалул хъуншагьру – Сочи. КIюрххил 9 ссятраву Сочилий лачIунукку, дунияллул чемпион ХIажимурад МахIаммадовлул каялувшиврулу бавтIунни Сочилул Олимпиадалул ирсну хъанахъисса «Сириус» тIисса дуккаврил центрданул оьрчIру. Ва центр сакин бувссар олимпий инфраструктуралул базалий АьФ-лул Президентнал сипталийну. Гьар шинах «Сириусрайн» бучIайссар 10-17 шинавусса 600 оьрчI билаятрал личIи-личIисса регионная. Миннавух бур спортсменталгу, элму ххирамигу, музыкачиталгу, къавтIалтгу, художникталгу.
КIюрххил зарядка дурну махъ оьрчIру гьуртту хьунни «Мой олимп» тIисса спортрал тестированиялий ва «Быстрее, Выше, Сильнее» тIисса тIуркIулуву. Микку оьрчIру кIул хьунни Аьрасатнал чемпионтурал хьхьичIунсса рекордирттащал, яла хIарачат буллай бия ми рекордру тикрал дан стилизованнайсса журалий кутIасса чIумуву.
Дяхтта «Олимпийский патруль» тIисса Аьрасатнал Олимпиадалул комитетрал (ОКР) программалуву «Сириусрал» дуклаки оьрчIан хасну хьунни олимпиадалул дарс, мунил хъамалну бия ОКР-данул президент Александр Жуков, Сочилийсса Олимпиадалул ва Паралимпиадалул тIуркIурдал оргкомитетрал бакIчи, «Газпром – Медиа Холдинграл» гендиректор, КХЛ-данул президент Дмитрий Чернышенко, Дунияллул халкьуннал олимпий комитетрал (МОК) член, Сочилийсса тIуркIурдан хасъсса МОК-рал координационный комиссиялул председатель Жан-Клод Килли, Дунияллул халкьуннал хоккейрал федерациялул президент Рене Фазель, Олимпиадалул тIуркIурдал МОК-рал исполнительный директор Жильбер Федли.
Дарсирай мукунма гьуртту хьунни Олимпий чемпионтал Анастасия Давыдова, Александр Зубков, Юлия Липницкая ва ХIажимурад МахIаммадов. ОьрчIал буллусса суаллахьхьун жавабру дуллунни цIа дурксса чемпионтурал, мукунма миннал бувсунни, цукун най бивкIссарив цалла ххувшавурттайн.
Яла олимпий объектирдай хьунни цаппара мастер-классру. Хоккейрал мастер-классрайн бувкIун бия олимпий чемпион, КХЛ-данул вице-президент Валерий Каменский ва олимпий чемпион, Москавуллал «Спартакрал» цалчинма вице-президент – генеральный менеджер Алексей Жиманов, мукунма «Сочи» клубрал хоккейрай буккулт Игорь Игнатушкин ва Константин Барулин.
Ялагу хьунни фигурный катаниялул мастер-класс, тиккун бувкIунни Сочилул олимпий чемпион душ Юлия Липницкая ва ганил тренер, олимпий чемпион Алексей Урманов.
Москавлив Спортрал кIинтнил журардал кьинилун хасъсса шадлугъру хьунни шанма хъунисса микIирай – ВДНХ-лий, Горькийл цIанийсса ЦПКО-лий ва ЯтIул майданнийсса ГУМ-рал микIирай. Ми площадкарттай хьунни фигурный катаниялул, шорт-трекрал, хоккейрал, керлинграл мастер-классру.
Мукуннасса шадлугъру хьуссар Аьрасатнал цаймигу регионнай.
