Февральданул 9-нний МахIачкъалалив Дусшиврул къатраву Дагъусттаннал БакIчи Рамазан АьбдуллатIиповлул дунни Дагъусттаннал БакIчиначIасса Вихшалалул инсантурал советрал цалчинмур заседание (заседание Совета доверенных лиц).

Заседание тIитIлай, Республикалул хъунаманал бувсунни Совет сакин баврил пикри ччянива бивкIшиву, цанчирча мукунсса совет бикIан аьркинну тIий. Ганал мукъурттийн бувну, Совет хъана­хъиссар граждан обществалул ца институт, му сакин баврил мурад хъанахъиссар дагъусттанлувтал цачIун, лагма-лаган баву, Дагъусттаннал БакIчинан обществалувусса проб­лемартту ккаккан баву ва ми щаллу бансса ххуллу-хха ккаккан баву. Рамазан АьбдуллатIиповлул увкусса куццуй, Советрал заседание кьас­ттан дурссар ДР-лул Халкьуннал Мажлисрайнсса Рисалалул хъирив. «Хъуннасса агьамшиву дуссар зуяту гьарманал цанмасса кIану лякъаврил Рисала дузрайн ду­ккан давриву», — увкунни Дагъусттаннал БакIчинал бавтIминнахь. Ганал мукъурттийн бувну, махъсса шиннардий тамансса давур­тту дуллай бур, амма чIярусса утти­гу дуван аьркинссар. Дагъусттан хьун аьркинссар ларайсса культура дусса, хьхьичIуннай хъит увку­сса республика, микку хъунмасса кIану бугьан аьркинссар Советрал 55 членнал.
Советрал экспертътурал чулуха къулагъас дикIан аьркинну дур жагьилтал Сириянавун лаглагаврил тагьарданух, АьФ-лул Госдумалувун ва ДР-лул Халкьуннал Мажлисравун бувчIавуртту даврих, дуккаврил, цIуллушиву дуру­ччаврил ва цаймигу масъаларттах.
Советрал 1-мур заседаниялий ихтилатру бунни личIи-личIисса отраслирдал вакилтурал. ЦIуллушиву дуруччаврил чулуха ихтилат бунни «Медицинский центр Р. П. Аскерханова» ОАО-рал гендиректор ХIамид Аскерхановлул. Ганал мукъурттийн бувну, залданувун бавтIун бур цалла давурттал лавайсса даражалул пишакартал, миннал цалва оьрмурду хас бувну бур Дагъусттаннан ва дагъусттанлувтуран. «Ччимур властьрал чул бищайссар тIайласса информациялийн, информация бакъасса власть ччяни лекьайссар», — увкунни профессорнал.
Спортрал обществалул чулухату ихтилат бунни 3-ла олимпий чемпион, лачIунукку Бувайсар Сайтиевлул. Ганал мукъурттийн бувну, цинявннан пикри буллан аьркинссар властьрачIан биян къабюхълахъиминная, гайннал мурадру щаллу буллан аьркиншиврия, кумаграх мюхтажминная. Ганал умуд бивхьунни Вихшала­сса инсантурал советраягу да­гъусттанлувтуран бунияласса кумаг хьуншиврийн.
Заседаниялий мукунсса ихтилатру бунни «Матери России» ккурандалул каялувчи Таиса МахIаммадовал, «Концерн КЭМЗ» ОАО-рал гендиректор Ибрагьим Ахматовлул, «Азамат» КФХ-лул каялувчи МахIаммад Аьлибулатовлул, ДГУ-рал кафед­ралул хъунама Мустапа Билаловлул ва цайминнал. Миннал ихтилатирттаву гьаз бунни промышленностьрал лябуккулул, жагьилтурал политикалул, шяраваллил хозяйствалул лябуккулул хIакъиравусса ва цаймигу масъалартту. Миннал бувсунни хIадурну бушиву кабакьин Республикалул хъунаманал язи бувгьусса ххуллу дузрайн бу­ккан баврил иширттацIун.
Заседаниялул ахирданий Советрал члентуран дуллунни удостоверенияртту.