«Лакия» тIисса Москавлив ялапар хъанахъисса лакрал жагьилтурал ккурандалул сипталийну, алхIат кьини хьуссар шийхсса Дагъусттаннал жагьилтурал хъунасса композитор Ширвани Чаллаевлущалсса хьунабакьаву.
Уттинин жулва жагьилтуран Ширвани Рамазановичлул цIа Дагъусттан дунияллийх машгьур бувсса бюхттулсса композиторшиврий гьарцаннан кIулну диркIхьурчагу, чIявуминнан ва цува гъанну цалчин ия ккаклай. Цинявппа хIайран хьуну бия Ширвани Чаллаев, цIа бюхттулсса композитор ухьурчагу, цува дакI хъун дакъасса, ххишала акъа аьчухсса, хъярчийсса инсан ушиврий. Гъирарай вичIи дирхьуну бия жагьилтал композиторнал цала оьрчIшивриясса, жагьилшивриясса, шяраваллил оьрмулиясса хавардах. Ванал пасихIсса ва щинтасса мазрай буллалисса ихтилатва бия балай кунма экьинай. Увкуна цаппарасса лакрал халкьуннал ва шаэртурал балайрдугу. Жагьилтал ххарину бия дунияллул лагрулул композиторнащал хьунабакьинсса сант дирияврия.
ХIурмат лавайсса Ширвани Рамазанович, мякь къаливххунма ливчIунну вил авадансса, пасихIсса ва щинтасса мазраягу, дуниял хIайран дурсса балайрдаягу. Ссавур дакъа ялугьланну вищалсса цIу-цIусса хьунабакьавурттах.
Аминат ЛухIуева,
ш.Москав
